گه‌ڕان

Shadow Shadow
سیاسه‌تی

ترس و دڵەڕاوکێیان لەلاى خەڵک دروست کردووە

برادۆست؛ سوپای تورکیا لە بەرزاییەکەوە تەقە لە سنوری گوندەکان دەکات

2020.06.18 - 15:11
برادۆست؛ سوپای تورکیا لە بەرزاییەکەوە تەقە لە سنوری گوندەکان دەکات

ناس کورد- ئاکۆ حەمەد رابی

پاشنیوەڕۆی ئەمڕۆ (پێنجشەممە، 18ی حوەزیرانى 2020) سەربازانی سوپای تورکیا لە بەرزاییەکەوە بە چەکی دۆشکاو بەشێوەی هەڕەمەکی تەقەیان لە ژمارەیەک گوندی سنوری برادۆست کرد، شایەتحاڵێکیش دەڵێت "بەو هۆیەوە ئاگر کەوتۆتەوە".

 

وڵات برادۆستی شایەتحاڵ و نیشتەجێی ناوچەکە بە ناس کوردی ڕاگەیاند " لەنزیک کاتژمێر 2:00 پاش نیوەڕۆی ئەمڕۆ سەربازانی سوپای تورکیا لە بەرزاییەکانی‌ چیادێل کە کردویەتیانە شوێنی بنکە و  بارەگا سەربازیەکانیان، بەشێوەی هەڕەمەکی تەقەیان لە‌ سنوری سێ گوندی ناوچەی برادۆست کرد".

 

ئاماژەی بەوەشدا کە " تەقەکردنەکە زیاتر لە چارەکێکی خایاند و بەو هۆیەوەش ئاگر لە پوش و پاوانی گوندنشینان کەوتۆتەوە".

 

ئەو شایەتحاڵە باسی لەوەشکرد کە تورکیا تەقەکەی لە سنوری هەریەک لە گوندەکانی لێلکان، ناومێرگان و کونڵە کردووەو بەو هۆیەوەش دانیشتوانەکەی تووشی ترس و دڵەڕاوکێ بوون.

 

هاوکات جەلال عوزێر، موختاری گوندی خەلیفان لە ناوچەی سنوری برادۆستی ناحیەی سیدەکانی قەزای  سۆران بۆ ناس کورد وتی "دۆخی ناوچەکە ڕۆژ لە دوای ڕۆژ بەرەو نائارامی زیاتر هەنگاو دەنێت".

 

جەختی لەسەر ئەوەشکردەوە کە " گوندنشینان و دانیشتوانی ناوچە سنوری و کوێستانیەکان بەهۆی بۆردومانی تورکیاوە ژیانیان ئەستەم و ناخۆش بووە".