گه‌ڕان

Shadow Shadow
سیاسه‌تی

دۆناڵد ترەمپ: جارێكی دیكە دەرگای چالاكییە ئابوری و بازرگانیەكان بەهۆى كۆرۆناوە داناخەین

2020.06.18 - 09:25
دۆناڵد ترەمپ: جارێكی دیكە دەرگای چالاكییە ئابوری و بازرگانیەكان بەهۆى كۆرۆناوە داناخەین

ناس کورد- 

سەرۆكی ئەمریكا ڕایگەیاند، جارێكی دیكە دەرگای چالاكییە ئابوریی و بازرگانییەكانی وڵاتەكەی بەهۆى كۆرۆناوە داناخات، ئەوەش لەكاتێكدایە لەچەند ویلایەتێكی ئەو وڵاتە ڕێژەی توشبوون و گیانلەدەستدان بەڤایرۆسەكە لەبەرزبونەوەدایە. 

 

لەچاوپێكەوتنێکیدا لەگەڵ كەناڵی فۆكس نیوزی وڵاتەكەی، دۆناڵد ترەمپ، سەرۆكی ئەمریكا ئاماژەى بەوە کرد، جارێكی تر وڵات بەهۆی كۆرۆناوە داناخەن و ناچاریش نین ئەوە بكەن. 

 

پێشتریش هەریەكە لە لاری كەدلۆ ڕاوێژكاری كۆشكی سپی بۆ كاروباری ئابوری و ستێڤن منۆچین وەزیری خەزێنەی ئەو وڵاتە ڕایانگەیاند، ویلایەتە یەكگرتووەكانی ئەمریكا چالاكییە ئابورییەكانی ڕاناگرێت.

 

لەمانگی ئادارەوە وەک خۆپارێزى لە ڤایرۆسى کۆرۆنا چێشتخانە و یاریگا و قوتابخانەكان و چەندین ناوەندی دیكە لە ئەمریکا داخراون و بەهۆى ڤایرۆسەکەوە تا ئێستا 2 ملیۆن و 16 هەزار کەس توشى ڤایرۆسەکە بوون و نزیكەی 118 هەزار توشبووش گیانیانلەدەستداوە. 

 

هەفتەی ڕابردووش 10 ویلایەتی ئەمریكا هەوڵێكی زیاتریان خستە گەڕ بۆ دابەزاندنی ئاستی توشبوو كە ماوەیەكە بەرزبووەتەوە و لەمیانەشدا ترسی ئەوە هەبوو لەگەڵ دەستپێكردنەوەی چالاكییە ئابورییەكاندا شەپۆلێكی دیكەی كۆرۆنا دەستپێبكاتەوە.