گه‌ڕان

Shadow Shadow
سیاسه‌تی

نەتوانراوە بۆ پشكنین سوودیان لێوەربگیردرێت

بەهۆی گەندەڵی لەكڕینی ئامێرى پشکنینى کۆرۆنا چەندین بەرپرس لە کەرکوک دەستگیرکران

2020.06.17 - 15:33
بەهۆی گەندەڵی لەكڕینی ئامێرى پشکنینى کۆرۆنا چەندین بەرپرس لە کەرکوک دەستگیرکران

ناس کورد-

دەستەی دەستپاكی عێراق ئاشكرای دەكات، بەهۆی گەندەڵیكردن لە كڕینی چەند ئامێرێكی پشكنینی ڤایرۆسى کۆرۆنا لە کەرکوک، نەتوانراوە سودیان لێوەربگیردرێت، بۆیە ئەوانەشی لەو كارە تێوەگلاون دەستگیركراون.

 

لە ڕاگەیەنراوێكدا دەستەی دەستپاكی فیدراڵی ڕایگەیاند، بەتۆمەتی تێوەگلانیان لەپڕۆژەی كڕینی ئامێری پشكنینی ڤایرۆس ژمارەیەك بەرپرسی تەندروستی سەر بەكەرتی تەندروستی پارێزگای كەركوك دەستگیركراون كە ئەو پرۆژەیە زیاتر لە180 ملیۆن دیناری بۆ تەرخانكراوە.

 

ئاماژەی بۆ ئەوەشكردووە، لێپێچینەوەكە بۆ گەڕانەوەی پارەكە و سزادانی ئەو بەرپرسانە لەسەر بنەمای یاداشتێكی دادگا هاتووە دوای ئەوەی كە دوو ئامێری پزیشكی كڕدراون لەدەرەوەى ستانداردە تەكنیكیەكان، سەرباری ئەوەش ئەو دوو ئامێرە بۆ پشكنینی ڤایرۆسی كۆرۆنا بەكار نەهێنراون بەهۆی ئەوەی ئەنجامەكانیان بۆ پشكنینی پەتاكە وورد نەبوون.

 

دەستەكە جەختی لەوەكردووەتەوە، دەركردنی بڕیاری دادوەری لێكۆڵینەوە بۆ دەستگیر كردنی بەرپرسی لقی تاقیگەكان و فەرمانبەر و بەرپرسی كاروباری هونەری و فەرمانبەری بەرپرس لە بانكی خوێن و سەرۆكی دەزگای تەندروستی پارێزگاكە بەپشتبەستن بەمادەی (340 ) یاسای سزادان بووە.

 

ئەوەش ڕوونكراوەتەوە، لەبەدواداچونێكی دیكەدا نوسینگەی دەستەكە لەو پارێزگایە توانیویەتی لێكۆڵینەوە لەكەیسێكی تردا بكات كە گومانی بوونی گەندەڵی تێدا دەکرێت لەپرۆژەیەك بۆ ئاوەدانكردنەوەی قەزا و ناحیەكانی سەر بەپارێزگاكە و بڕی 246 ملیۆن دیناری بۆ خەرج كراوە، دواتر بۆی دەركەوتووە گەندەڵی لەدابینكردنی خزمەتگوزارییەكانی پرۆژەكەدا كراوە و بەو هۆیەشەوە فەرمانی گرتن بۆ لیژنەی جێبەجێكاری پرۆژەكە و چەند كەسێكی تری پەیوەندیداری پرۆژەكە دەركراوە بەپێی هەمان مادەی سزادان.