گه‌ڕان

Shadow Shadow
سیاسه‌تی

سەرچاوەى دوبارە بڵاوبوونەوەكە ديار نييە

کۆرۆنا تازە لە پایتەختی چین سەرهەڵدەداتەوە.. قوتابخانە و زانکۆکان داخرانەوە

2020.06.16 - 23:05
کۆرۆنا تازە لە پایتەختی چین سەرهەڵدەداتەوە.. قوتابخانە و زانکۆکان داخرانەوە

ناس کورد- 

دواى سەرهەڵدانەوەى ڤايرۆسى كۆرۆنا لە وڵاتى چين بەتايبەتى لە پەكينى پايتەخت، دووبارە قوتابخانەكان و زانكۆكان داخرانەوە و بارودۆخى پەتاكەش بە "زۆر مەترسيدار" وەسف دەكرێت.

 

سەرچاوە هەواڵییەکانی چين بڵاويانكردەوە، دواى ئەوەى ژمارەى توشبووانى ڤايرۆسى كۆرۆنا زياديان كردوە، حكومەت بڕياري داوە دووبارە قوتابخانە و زانكۆكان دابخرێنەوە، دەسەڵاتدارانيش پشكنينيان بۆ هەزارەها كەس كردوە و لە پێنج ڕۆژدا 106 توشبوى تر تۆمار كراون.

 

ڕونيشكراوەتەوە، دەسەڵاتدارانى پەكين داوايان لە دانيشتوانى شارەكە كردوە كە ئەگەر زۆر پێويست نەبێت گەشت نەكەن بۆ دەرەوەى شارەكە و ئەو ناوچانەشى ڤايرۆسەكەيان تێدا بڵاوبوەتەوە رێگە بە دانيشتوانەكانيان نادرێت كە پايتەخت جێبهێڵن.

 

"زۆر مەترسيدارە"

شۆ هيجيان، وتەبێژى شارەوانى پەكينى پايتەخت هۆشدارى داوە لە بارودۆخى پەتاى كۆرۆنا لە شارەكە و بە "زۆر مەترسيدار" وەسفى كردوە، ڕونيشيكردوەتەوە: "پەكين كێبڕكێ لەگەڵ كاتدا دەكات لە بەرەنگاربونەوەى ڤايرۆسى كۆرۆنا".

 

بەپێى زانياريەكانى دەستەى تەندروستی نيشتمانیى چين، لە چەند ڕۆژى رابردوودا زياتر لە 90 هەزار پشكنين بۆ هاوڵاتيانى چين كراوە و تەنها ڕۆژى دووشەممە 40 توشبوو تۆمار كراون و ڕۆژى پێشتريش 49 توشبوو تۆماركراون و لە توشبوە نوێكاندا 27 يان لە شارى پەكين بوە، ڕۆژى پێش ئەوەش لەهەمان شار 36 حاڵەتى تر تۆمار كراون.

 

هەفتەى ڕابردوو دەسەڵاتدارانى پەكين بازاڕى ناوچەى "فانتاى"يان بەشێوەيەكى كاتى داخست، ئەوەش دواى ئەوەى لەكاتى پشكنينەكاندا دەركەوت كە ئەو تەختەيەى ماسى لەسەر پاك دەكەن ڤايرۆسى كۆرۆناى پێوەيە و حاڵەتى لەناكاويش ڕاگەيەنرا.



تەندروستى جيهانى لێكۆڵينەوە دەكات

ڕێكخراوى تەندروستی جيهانى بڵاويكردوەتەوە، دڵنيا نیين كە بۆچى دوبارە پەتاى كۆرۆنا لە پەكين سەريهەڵداوتەوە و تائێستا هۆكارەكەى ئاشكرا نييە، بەڵام بەدوريشى دەزانن كە لەرێگەى ئەو ماسيە سەلەمۆنانەوە بڵاوبوبێتەوە كە هاوردەى چين كراون، هەروەك پێشتر هەندێك ڕاپۆرت باسيان لێوەكردوە.

 

بەرپرسانى رێكخراوەكە لە كۆنگرەيەكى ڕۆژنامەوانى ڤيديۆييدا ڕونيشيان كردوەتەوە، هۆكارى دەركەوتنى ئەو زنجيرە نوێيەى توشبووان لە پەكين تائێستا ئاشكرا نييە، ئەوەشى لەرێگەى ماسى هاوردەوە بووە تەنها ئەگەرێكە و لەناو ئەگەرەكانى تردا بەهێز نييە.

 

هەر لەو بارەيەوە، مايك ڕايان، سەرۆكى بەرنامەى فرياكەوتنى ڕێكخراوەكە وتويەتى، لە نزيكەوە بەدواداچون بۆ ئەو بڵاوبونەوەيە دەكەن و پەيوەندى پتەويان لەگەڵ دەسەڵاتدرانى تەندروستیى چين هەيە.