گه‌ڕان

Shadow Shadow
سیاسه‌تی

لەهەولێر چەند قائیمقامێک ئاڵۆگۆڕیان پێکرا و لەشوێنی یەکتر دەستبەکاربوون

2020.06.16 - 17:09
لەهەولێر چەند قائیمقامێک ئاڵۆگۆڕیان پێکرا و لەشوێنی یەکتر دەستبەکاربوون

ناس کورد-

 

لەچەند قەزایەکی سنوری پارێزگای هەولێر چەند قائیمقامێک ئاڵوگۆڕیان پێکرا و لەجێگەی یەکتر دەستبەکاربوون، جێگری پارێزگاری هەولێریش دەڵێت، گۆڕانکارییەکان بۆ بەرژەوەندی گشتییە.

 

لە ڕاگەیەندراوێکدا ڕاگەیاندنی پارێزگای هەولێر ڕایگەیاند: "لەچوارچێوەی گۆڕانکارییەکان و بەمەبەستی زياتر خزمەتکردنی هاوڵاتییانی سنووری پارێزگای هەولێر، سەرلەبەیانی ئەمڕۆ سێشەممە 16ی حوزەیرانی 2020، بە سەرپەرشتی هێمن قادر، جێگری پارێزگاری هەولێر، دەستکرا بە ئاڵۆگۆڕی هەر یەک لە قایمقامی قەزاکانی (شەقڵاوە، دەشتی هەولێر، خەبات).

 

ئاماژە بەوەشکراوە، لەو چوارچێوەیەدا و لە ڕێوڕەسمێکدا، قایمقامی قەزای دەشتی هەولێر لە جێگەی جوان رەفیق، قایمقامی قەزای شەقڵاوە دەست بەکار بوو و جوان رەفیقیش، وەک قایمقامی قەزایی دەشتی هەولێر لە جێگەی ئیبراهیم شێخەڵا دەست بەکاربوو، پاشان کوێستان ئەحمەد، قایمقامی قەزایی ڕەواندوز وەک قایمقامی قەزای خەبات دەست بەکار بوو.

 

لەوبارەیەوە هێمن قادر، جیگری پارێزگاری هەولێر، ڕایگەیاند: "ئەو گۆڕانکاری و جیگۆڕکێیەی دەستمان پێیکردووە، بۆ بەرژەوەندی گشتی و خزمەتکردنی زیاتری هاوڵاتییانە بە ڕوحیەت و ئەزمونێکی نوێ، لەهەفتەی ڕابردووشدا هەمان پرۆسەمان لە ناحییەکان دەست پێکرد".

 

جێگری پارێزگاری هەولێر وتیشی، دڵنیان هەر یەک لە قایمقام و بەڕێوەبەری ناحییەکان، لەڕووی یاسایی و کۆمەلایەتیەوە خاوەنی ئەزموونێکی چاک و توانایەكی زۆرن لەکارەکانییاندا و دەتوانن خزمەتی زۆری هاوڵاتییانی سنوورەکانییان بکەن، بۆیە ئەو جۆره‌ گۆڕانکاریانەش لە قەزایەکه‌وه‌ بۆ قەزایەک و لە ناحییەکەوە بۆ ناحیەیەکی دیکە، کارێکی ئیدارییە و مەبەست لێ گواستنەوەی ئەزموون و خزمەتکردنی زیاتر هاولاتییانە.