گه‌ڕان

Shadow Shadow
سیاسه‌تی

’دەیان ئۆتۆمبێلى ئاسایش و پۆلیس بڵاوەى پێکرابوو’

وردەکارى دەستگیرکردنى چالاکوانانى هەولێر لەسەر زارى بەشێک لە دەستگیرکراوەکان [تایبەت]

2020.06.16 - 13:46
وردەکارى دەستگیرکردنى چالاکوانانى هەولێر لەسەر زارى بەشێک لە دەستگیرکراوەکان [تایبەت]

ناس کورد- تایبەت

دوابەدواى بۆردومانى فڕۆکە جەنگییەکانى تورکیا بۆ سەر چەند ناوچەیەکى هەرێمى کوردستان، ژمارەیەک لە چالاکوان و ئەندامى پارتەکانى زەحمەتکێشانى کوردستان و حزبى شیوعى کوردستان ئامادەکارى دەکەن بۆ ئەنجامدانى گردبوونەوەیەکى ناڕەزایەتى لەبەردەم بارەگاى رێکخراوى نەتەوە یەکگرتووەکان، بەڵام بەوتەى بەشێک لە چالاکوانەکان بەر لەوەى گردبوونەوەکە دەستپێبکات لەلایەن هێزە ئەمنییەکانەوە بەشێوەیەکى ڕەشبگیرى دەستگیرکردنى ئامادەبووان دەستپێدەکات و بەوتەى خۆیان زیاتر لە 40 چاکوان و خەڵکى سیاسى دەستگیردەکرێن.

 

هەڤاڵ عەبدوڵا، ئەندامى سەرکردایەتى حزبى زەحمەتکێشان کە یەکێک بوو لە دەستگیرکراوەکانى دوێنێ لە لێدوانێکى تایبەت بە ناس کوردى وت "لەو بڕوایەدابووین لە کاتێکدا دەوڵەتى تورکیا سنورى هەرێمى کوردستانى بەزاندووە دەبێت پرۆتەستۆى ئەو کارە بکەین".

 

ئەو لەو بڕوایەدایە بەهۆى ئەو بارودۆخەى کوردستانەوە هێزە ئەمنییەکان هەر گردبوونەوەیەک و ڕێپێوانێک بە ئاقارى تر لێى دەڕوانن.

 

رەتیشیکردەوە لەکاتى دەستگیرکردنەکە هێزە ئەمنییەکان مامەڵەى خراپیان لەگەڵ کردبێتن و وتى "وەک خۆم هیچ مامەڵەیەکى نەشیاوم بەرامبەر نەکراوە".

 

ئەندامەکەى سەرکردایەتى زەحمەتکێشان رونیشیکردەوە، هیچ کات لەسەر هەڵوێستەکانى خۆیان پاشگەزنابنەوە ئەگەر کاریگەریش بکاتە سەر پەیوەندییەکانیان لەگەڵ لایەنە سیاسیەکانى تر .

 

"ئەو کارانە بۆ هیچ ڕژێمێک ناچێتە سەر"

هەڤاڵ عەبدوڵا سەرکوتکردن و رێگریکردنى خۆپیشاندان و ناڕەزایەتییەکانى وەک شێوەیەک لە شێوەکانى سیستمەکانى دیکتاتۆریەت ناوبرد کە هەمیشە رێگرى لە خەڵکى ئازادیخواز دەکەن و وتیشى "ئەوە بۆ هیچ ڕژێمێک ناچێتە سەر".

 

ناس کورد زانیوویەتى لە گردبوونەوەکەى دوێنێدا 43 چالاکوان دەستگیرکراوە و  درەنگانێکى شەوى رابردوو سەرجەمیان ئازادکران.

 

"دەسەڵاتدارانى کورد ناتوانن رێگربن لەبەرامبەر ئازادى خەڵکدا"

عەلى مەحمود چالاکوانى سیاسیى باسى ئەو کاتانە بۆ ناس کورد دەکات کە چالاکوانان ئامادەکارییان بۆ گردبوونەوە و خۆپیشاندانەکە دەکرد و ئاماژەى بەوە کرد بەدەیان ئۆتۆمبێلى ئاسایش و پۆلیس بەجلوبەرگى سەربازى و مەدەنى بەشوێنى گردبوونەوەکە بڵاوەى پێوەکرابوو.

 

وتیشى، بەهۆى ئەوەى دەمامکى بەستبوو نەناسراوەتەوە ئەگینا هێزە ئەمنییەکان ئەویشیان دەستگیردەکرد بەوپێیەى لە زۆربەى زۆرى خۆپیشاندانەکان و گردبوونەوەکان ئەو یەکێک بووە لە دەستگیرکراوەکان.

 

بۆ دەسەڵاتى کوردى شتێکى زۆر ناشرینە کە بەردەم بارەگاى نەتەوە یەکگرتووەکان دەکرێتە ناوچەیەکى سەربازى

 

جەختیشى لەسەر ئەوە کردەوە لە گردبوونەوەکەدا ئامادەبووان سەرجەمى رێکارەکانى خۆپارێزییان لە بەستنى دەمامک و دەستکێش جێبەجێ کردبوو.

 

بەپێویستیشیزانى دەسەڵاتدارانى کوردستان بەخۆیاندا بچنەوە و جەختى لەسەر ئەوە کردەوە کە ئەوان ناتوانن رێگربن لەبەرامبەر ئازادى خەڵکدا.

 

 

"ئەو کارەى هێزە ئەمنییەکان بەرتەسککردنەوەى کارى مەدەنى و ئازادییەکانە"

هیوا سەید سەلیم، چالاکوانێکى سیاسى دیکەى شارى هەولێرە و ئەو بۆردومانکردنى شەنگال هەتا بنارى قەندیل و گوندەکانى دەوروبەرى رەواندوز و برادۆست و ئامێدى و ئاکرێ و بۆردومانى کەمپى ئاوارەنشینى ئێزیدیان و کەمپى مەخمور لەلایەن فڕۆکە جەنگییەکانى تورکیاوە بە روداوێکى زۆر غەمناک ناودەبات و ئاماژە بەوە دەکات کە ئەوە دەستوەردانێکى زەقى دەوڵەتى تورکیا بووە لە کاروبارى هەرێمى کوردستان.

 

 

هیوا سەید سەلیم بە ناس کوردى وت "نەک هەر رێگرى لەو گردبوونەوەیە کرا کە بۆ پرۆتەستۆکردنى بۆردومانەکانى تورکیا بەنیازبوون لە بەردەم بارەگاى نەتەوە یەکگرتووەکان ئەنجامى بدەن بەڵکو بەشێکى زۆرى چالاکوانەکان دەستبەسەرکران و بۆ چەند کاتژمێرێک لە بنکەکانى پۆلیس راگیران.

 

ئەو چالاکوانە ئەم کارانە بە بەرتەسککردنەوەى کارى مەدەنى ئازادییەکان ناودەبات و بە رێگرى لەدەنگهەڵبڕینى خەڵک بەرامبەر بە سیاسەتى داگیرکارانەى تورکیا  ناوزەدەى دەکات.

 

"دانە دانە وێنە و ڤیدیۆى دەستگیرکراوەکانیان دەگرت"

 

هیوا عومەر، ئەندامى مەکتەبى سیاسى حزبى شیوعى کوردستان و چالاکوانى سیاسى باسى ئەوە بۆ ناس کورد دەکات کە دوێنێ لە گردبوونەوەکەدا خۆیى و هاوسەرەکەى لەنێو ئۆتۆمبێلەکەى خۆیاندا لەلایەن هێزە ئەمنییەکانەوە دەستگیرکراوون.

 

هیوا عومەر بە ناس کوردى وت "لەکاتێکدا حکومەتێکى بێهەڵوێستمان هەیە بەرامبەر بە لەشکرکێشى وڵاتان بۆ سەر خاکى هەرێم، هاووڵاتیانى شارى هەولێر ویستیان هەڵوێست وەربگرن بەڵام بەداخەوە ئەمان ئەوەشیان پێ قبوڵ ناکرێت".  

 

جەختیش دەکاتەوە کە بەشێوازێکى زۆر ناشرین مامەڵەیان لەگەڵ کراوە بەتایبەتى دەزگاکانى پاراستن و ئاسایش و بەجلى مەدەنییەوە لەناو ئۆتۆمبێلى پۆلیس و ئاسایشدا بوون و دانە دانە وێنە و ڤیدیۆى دەستگیرکراوەکانیان دەگرت.

"لەلایەن کەسانێکى مەدەنییەوە دەستگیرکراین کە نەمانزانیوە کێن؟"

هەرچى ڕێباز فاروق گەڕاوى-یە باس لەدیوێکى ترى دەستگیرکردنى چالاکوانەکان دەکات کە ئەو خۆى یەکێک بووە لە دەستگیرکراوەکان و ئاماژە بەوە دەکات لەلایەن کەسانێکى مەدەنییەوە دەستگیرکراوون کە نەیانزانیوە کێن و ناسنامەیان دیار نەبووە.

 

ڕێباز فاروق گەڕاوى، یەکێک لە دەستگیرکراوەکانى دوێنێى بەردەم بارەگاى نەتەوە یەکگرتووەکان بە ناس کوردى وت "پێش گردبوونەوەکە لە لایەن هێزێکی هاوبەشی ئاسایش، پۆلیس، گروپێک مەدەنی کە نەمانزانی کێن دەسگیرکراین، دوای سوکایەتی پێکردن بە چەند هاوڕێییەکمان و هەوڵی ترساندنی چالاکوانان بە وێنە گرتن و ڤیدیۆ تۆمارکردن و هێشتنەوەمان، بە فشاری خەڵکی ئازادی خواز ئازاد بووین" .

 

"هەر کەسێک بەو ناوەدا ڕەتبووایە دەستگیریان دەکرد"

بایەزید کەریم، یەکێکى تر لە چالاکوانە دەستگیرکراوەکانى گردبوونەوەکە باس لە سەربازکردنى دەوروبەرى بارەگاى نەتەوە یەکگرتووەکان بۆ ناس کورد دەکات و ئاماژە بە بوونى لەشکرێک لە ئاسایش و پۆلیس دەکات لەو ناوە بەر لە ئەنجامدانى گردبوونەوەکە.

 

بەوتەى ئەو تەنانەت هەر کەسێک بەو ناوەدا ڕەتبووایە دەستگیریان دەکرد.

 

بایەزید کەریم ئاماژەى بەوەش کرد، براون بۆ بنکەى پۆلیسى بەختیارى و وێنەى فۆتۆ و ڤیدیۆییان گیراوە و سوکایەتییان پێکراو مامەڵەیەکى خراپیان لەگەڵ کراوە.