گه‌ڕان

Shadow Shadow
سیاسه‌تی

’’کازمی زۆر پیشەییانە کاری کردووە’’

ناس كورد وردەكاری دەنگۆی دامەزراندنی حزب لەلایەن كازمییەوە بڵاودەكاتەوە

2020.06.15 - 16:38
ناس كورد وردەكاری دەنگۆی دامەزراندنی حزب لەلایەن كازمییەوە بڵاودەكاتەوە

ناس کورد-

پەرلەمانتارێكی هاوپەیمانی نیشتیمانی ڕایدەگەیەنێت، لە وتار و جموجۆڵەكانیدا، مستەفا كازمی، سەرۆكوەزیرانی عێراق نیەتی بۆ ئایندەیەكی سیاسیی هەیە و گەر وەكو ئێستا بێ لایەنانەش كاربكات پێدەچێت سەركەوتوو بێت.

 

زەینون حوسێن موراد، پەرلەمانتاری هاوپەیمانی نیشتیمانیی لە پەرلەمانی عێراق لە لێدوانێکی تایبەتدا بە ناس كوردی ڕاگەیاند: "نەمبیستووە مستەفا كازمی بەرنامەی دامەزراندنی فراكسیۆنێكی نوێی لەناو پەرلەمان، یاخود بەرنامەی دامەزراندنی حزبێكی نوێ سیاسی هەبێت، بەڵام لە وتارەكانیدا جوڵەیەكی سیاسی بۆ ئایندە دەبینرێت". 



وتیشی، پێشتر كازمی لە كارەكانیدا پیشەییانە كاری كردووە و ئەو هەنگاوە سەرەتاییانەش كە ناویەتی لەو ماوە كەمەدا پیشەییانە بووە و كارنامەكەشی خاڵی گرنگ و ستراتیژی تێدایە و سەربەخۆیانە کار دەكات، زۆربەی لایەنەكان سەرنجی باشیان لەسەری هەیە و دەكرێت بۆ ئایندەش بەرنامەی خۆی هەبێت.



لە وەڵامی ئەوەی ئەگەر ئاڕاستەیەكی سیاسی نوێ ڕابگەیەنێت چ لایەنێكی سیاسیی گەورەی شیعەكان پشتیوانی دەكەن، زەینوون وتی: "لەو باوەڕەدا نیم ئێستا نیەتێكی لەو شێوەیەی هەبێت، بەڵام خۆ ئەگەر بەشێوەیەكی سەربەخۆیانە كاربكات بۆ پاراستنی بەرژەوەندییە باڵاكانی عێراق ئەوا پێویستە هەموو پێكهاتەكان پشتیوانی لێ بكەن". 



پەرلەمانتارەكەی هاوپەیمانی نیشتیمانی باسی لەوەش كرد، كازمی زیاتر وەكو كەسایەتییەكی سەربەخۆ متمانەی لەناو پەرلەمانەوە وەرگرتووە و زۆربەی لایەنە سیاسییەكان پشتیوانیان لێكردووە، گەر بەرنامەیەكی هەبێت بۆ داهاتوو بۆ ئەوەی حزب و لیستی هەبێت، ئەوا دەبێت كارەكانی پاڵپشتی بكەن و بە جیاوازییەكانیەوە كاربكات.



ئەمە لەکاتێکدایە، چەند میدیایەكی عێراقی ئەوەیان بڵاو كردەوە، مستەفا كازمی، سەرۆكوەزیرانی عێراق لەئێستا دەستی كردووە بە پڕۆژەیەكی سیاسیی نوێ و دەیەوێت جوڵانەوەیەكی سیاسی لە پەرلەمانەوە دەستپێبكات بۆ ئەوەی پاڵپشتی بۆ پڕۆژەكەی بەدەستبهێنیت و لەداهاتوودا لیستێكی نوێ بۆ هەڵبژاردنی ئایندە ڕابگەیەنێت، تا بتوانێت پۆستی سەرۆكوەزیران بەدەستبهێنیتەوە.

 

ئاماژەیان بۆ ئەوەشكردووە، بۆ ئەوەش چەندین پەرلەمانتار پشتیوانی پڕۆژە نوێیەكەی كازمی دەكەن و پێدەچێت لەهەنگاوەكانیدا سەركەوتوو بێت.