گه‌ڕان

Shadow Shadow
سیاسه‌تی

’ئەو نەخۆشخانانەی تایبەت کران بە کۆرۆنا پڕن لە نەخۆش’

جێگرى بەڕێوەبەرى گشتى تەندروستى سلێمانى: چاوەڕوانى ئەوەمان دەکرد دۆخەکە واى لێ بێت 

2020.06.15 - 15:14
جێگرى بەڕێوەبەرى گشتى تەندروستى سلێمانى: چاوەڕوانى ئەوەمان دەکرد دۆخەکە واى لێ بێت 

ناس کورد - رۆژیار سیروان 

جێگرى بەڕێوەبەرى گشتى تەندروستى سلێمانى داوا لە هاووڵاتیان دەکات لەم قۆناغەدا خۆیان بپارێزن و ئەگەر هیچ نیشانەیەکى توشبوونى ڤایرۆسى کۆرۆناى نەبوو سەردانى نەخۆشخانەکان نەکات. 

 

هێرش سەید سەلیم، جێگری بەرێوەبەری گشتی تەندروستی سلێمانی بە ناس کوردى راگەیاند "بەهۆی زۆربوونی رێژەی پشکنین بۆ هاووڵاتیان داوا لەو کەسانە کراوە ئەگەر نیشانەی نەبێت پێویستی بە پشکنین نابێت و تەنها خۆی بپارێزێت و لەئەگەری دەرکەوتنی هەر نیشانەیەک سەردانی نەخۆشخانەکان بکەن بەمەبەستی پشکنین بۆ دڵنیایی خۆیان". 

 

رەتشیکردەوە هیچ برە پارەیەک لە هاووڵاتیان وەربگیرێت بەرامبەر بە پشکنینی کۆرۆنا و هەوڵەکانیان بەردەوامە بۆ ئەوەی زۆرینەی هاووڵاتیان پشکنینیان بۆ بکرێت و دەستنیشان بکرێن .




ئاماژەى بەوەش کرد، مەترسیەکانی ڤایرۆسی کۆرۆنا روو لە هەڵکشان دەکات و چاوەروانی ئەوەیان دەکرد بەو رادەیە زیاد بکات و لە کۆنترۆڵ دەربچێت. 

 

هێرش سەید سەلیم ، رونیکردەوە "ئاماری توشبووانى ڤایرۆسی کۆرۆنا لە سلێمانی رووی لە هەڵکشان کردووە و رێژەی مردنیش زیادی کردووە هەموو ئەمانە جێگای نیگەرانی ئێمەیە ئەگەر بەو ئاراستەیە بەردەوام بێت جێگای مەترسیە".  

 

وتیشی ، پێشتر ترسمان لەم بارودۆخە هەبوو بۆیە ئێستا دەگەینە ئەو ئاستەی بارودۆخەکە لە کۆنترۆڵ دەربچێت چونکە سەرجەم ئەو نەخۆشخانانەی تایبەت کران بە کۆرۆنا پربۆتەوە و لەبەرنامەدا هەیە نەخۆشخانەی تر دابین بکرێت. 

 

جێگرى بەرێوەبەری گشتی تەندروستی سلێمانی رەتیکردەوە بەرپرسانى تەندروستى هەرێم هەوڵ بۆ ترساندنى خەڵک بدەن و ئاماژەى بەوە کرد ئەوان هۆشدارى دەدەنە هاووڵاتیان لە مەترسى دۆخەکە و ئەوە بەرپرسیارێتى ئەوانە و نایانەوێ سبەینێ سەرکۆنە بکرێن و بوترێت "بۆچی هۆشداریتان نەدا لە ترسناکی بارودۆخەکە". 



جەختیشى لەسەر ئەوە کردەوە کە بایکۆتکردنى کەرتى تەندروستى لەم کاتەدا دوو هێندە مەترسییەکان زیاتر دەکات. 

 

هێرش سەید سەلیم باسی لەوەش کرد ، لەئێستادا کێشەی کەمبوونەوەی ئۆکسجین لەسەرجەم نەخۆشخانەکان چارەسەر کراوە و هیچ گرفتێکیان نەماوە بەڵام رێژەی تووشبوان زیاد بکات جێگای مانەوەی نەخۆش نامێنێت و گرفتی تریان بۆ دروست دەبێت.