گه‌ڕان

Shadow Shadow
سیاسه‌تی

’پارەیەکی زۆری بۆ تەرخان کردووە’ 

ئێران سەرقاڵی بڵاوکردنەوەی ئاینزای شیعەیە لە سوریا 

2020.06.14 - 16:34
ئێران سەرقاڵی بڵاوکردنەوەی ئاینزای شیعەیە لە سوریا 

ناس کورد-

ڕوانگەی سوری بۆ مافەکانی مرۆڤ ئاشکرایکرد، ئێران نەداری و خراپی بژیۆی ژیانی هاووڵاتیانی سوریای لە ناوچەکانی خۆرئاوای ڕووباری فورات قۆستوەتە و لەئێستادا سەرقاڵی بڵاوکردنەوەی ئاینزای شیعەیە لەو ناوچانە، جەختیشى کردەوە "میلیشیایەکی شیعەى عێراق لەو کارەدا هاوکاریی دەکات".

 

بەگوێرەی ڕاپۆرتێکی ڕوانگەی سوری بۆ مافەکانی مرۆڤ، "لە ئێستادا ئێران بەچڕی دەستیداوەتە بڵاوکردنەوەی ئاینزای شیعە لە شارەکانی مەیادین، ئەبو کەمال، دیرەزور و ئەو ناوچانەی کە دەکەونە خۆرئاوای ڕووباری فوراتەوە، وەک ئامرازێکیش بۆ بڵاوکردنەوەی ئەو ئاینزایە لە ئێستادا سەرقاڵی دروستکردنی پەیمانگای ( نور ساتع)ە".

 

لە راپۆرتەکەدا ئاماژە بەوە کراوە "لە ئێستادا ئێران گرەو لەسەر یاریکردن بە بیروباوەڕی تایفەگەریی و ئاینی دەکات لەو ناوچانە و هەژاری خەڵکی ناوچەکەشی بۆ هێنانەدی مەرامەکانی قۆستۆتەوە".

 

 ڕوانگە سورییەکە، ئەوەشی خستوەتە ڕوو، "ناوەندی ڕۆشنبیری ئێران لە ئێستادا هەموو هەوڵەکانی خستوەتە گەڕ بۆ بنیادنانی پەیمانگەی (نور ساتع) بۆ ئەوەی لەڕێگەیەوە بتوانێت زۆرترین ژمارە لە گەنجان، هەرزەکاران و منداڵان چەواشەبکات بۆ ئەوەی بتوانێت لەو ناوچانەدا شوێن پێی خۆی قایم بکات".

 

بەگوێرەی زانیارییەکانی ڕوانگە سورییەکە کە لەچەند سەرچاوەیەکەوە وەرگیراوە، " لە 6ی ئایاری ڕابردوودا 200 ئەندامی میلیشای ( لیوای ئیمام مەهدی) عێراقی گەیشتوونەتە ناوچەکانی (مەزارع سەربەشاری مەیادین لە ریفی دێرەزور)".

 

رونیشکراوەتەوە، ئەو چەکدارە عێراقییانە پێشتر لەو ناوچانە بوونیان نەبووە، بەڵام لە ئێستادا و بەشێوەیەکی فراوان خەریکن لە ناوچەکانی خۆرئاوای فورات هەژموونی خۆیان دەسەپێنن".

 

ڕوانگەکە ئەوەشی خستوەتەڕوو، "میلیشیا عێراقییەکە لەڕێگەی هەڵڕژاندنی پارە و قۆستنەوەی ئاڵۆزی مەزهەبگەری لە ناوچەکەدا سەرقاڵی بەسەربازکردنی دانیشتوانی ناوچەکەن".



 لەدەسپێکی سەرهەڵدانی ئاڵۆزییەکانی سوریا لە ساڵی 2011، ئێران بەهەموو شێوەیەک هاوکاری ڕژێمی ئەسەد دەکات و قاسم سلێمانی فەرماندەی کوژراوی فەیلەقی قودسی سوپای پاسدارانی ئێران سەرپەرشتی چالاکییەکانی ئێرانی دەکرد لەو وڵاتە.