گه‌ڕان

Shadow Shadow
سیاسه‌تی

خوشكەكەى كيم جۆنگ ئون هەڕەشەى جوڵەى سەربازى لە كۆرياى باشور دەكات

2020.06.13 - 23:19
خوشكەكەى كيم جۆنگ ئون هەڕەشەى جوڵەى سەربازى لە كۆرياى باشور دەكات

ناس کورد- 

كيم يۆ جۆنگ، خوشكى كيم جۆنگ ئون، سەركردەى كۆرياى باكور هەڕەشەى رێوشوێنى تۆڵەكردنەوە لە كۆرياى باشور دەكات كە بەكارهێنانى هێزى سەربازيش يەكێكە لە ئەگەرەكان، ئەوەش بەهۆى ئەو هەڵمەتە ڕاگەياندنەى دژى وڵاتەكەى بەڕێوە دەبڕێت.

 

كيم يۆ جۆنگ كە بەشێوەيەكى نافەرمى وەك يەكێك لە گەورە ڕاوێژكارانى كيم جۆنگ ئون كار دەكات ڕاگەیەندراوێکی هۆشدارى لە ئاژانسى هەواڵى ناوەندى كۆرياى باكور بڵاوكردوەتەوە و تێيدا هاتوە: "لە چوارچێوەى ئەو دەسەڵاتەى هەمە كە سەركردەى باڵاى حزب و دەوڵەتەكەمان پێيان داوم ڕێنماييم بۆ ئيدارەى بەرپرس لە كاروبارەكان لەگەڵ دوژمندا دەركردوە بۆ ئەوەى جێبەجێ بكرێن، ئەوەش بەپێى ڕێوشوێنەكانى داهاتوو". 

 

لە ڕاگەیەندراوەکەدا هيچ ئاماژەك بە ڕێوشوێنە نوێكان نەكراوە و ئەوەش دواى چەند ڕۆژێك دێت لەوەى كە كۆرياى باشور رێوشوێنى ياسايى دژى ئەو جيابوەوانەى كۆرياى باكور گرتەبەر كە لە وڵاتەكەيين و كەلوپەل و خۆراك و بڵاوكراوە دژى ڕژێمى كۆرياى باكور لەڕێگەى باڵۆنەوە، ياخود لەڕێگەى بتڵى شوشەوە بە دەريادا دەنێرنە ئەو وڵاتە.

 

لاى خۆشيەوە كۆرياى باكور ئاماژەى بەوەداوە، ئەو جيابوەوانە توڕەيان دەكەن و لە بەرامبەر ئەوەشدا هێڵى گەرمى لەگەڵ كۆرياى باشور بڕى و هەڕەشەى داخستنى نوسينگەى پەيوەنديەكانى نێوان هەردوو حكومەتەكەش دەكات.

 

هەروەها كۆرياى باشور وەك هەوڵێك بۆ باشتركردنى پەيوەنديەكانى لەگەڵ هاوسێ باكوريەكەى دەستى كردوە بە هەڵمەتێك بۆ وەستاندنى ناردنى پێداويستى و بڵاوكراوە، جيابوەوەكانيش لەوە نيگەرانن كە پەستانيان دەخرێتەسەر بۆ ئەوەى چيتر ڕەخنە لە ڕژێمى پيۆنگ يانگ نەگرن.

 

شيكەرەوان پێيانوايە، كۆرياى باكور بابەتى بڵاوكراوەكان وەك هەل بەكاردەهێنێت بۆ ئەوەى پەستان لەسەر هاوسێ باشوريەكەى دروست بكات، ئەوەش دواى ئەوەى گفتوگۆكانى داماڵينى چەكى ئەتۆم لەگەڵ ئەمريكا وەستا.