گه‌ڕان

Shadow Shadow
سیاسه‌تی

ئایا ڕاکان سەعید بە فەرمی بووە بە پارێزگاری کەرکوک؟

2020.06.13 - 16:34
ئایا ڕاکان سەعید بە فەرمی بووە بە پارێزگاری کەرکوک؟

ناس کورد-

لەدوای بڵاوبوونەوەی دەنگۆی بوونی ڕاکان سەعید بە پارێزگاری کەرکوک بە فەرمی، ئەندامێکی کورد لە لیژنەی باڵای ئاساییکردنەوەی دۆخی شارەکە ڕایگەیاند، پەیوەندییان بە نوسینگەی سەرۆکوەزیرانی عێراقەوە کردووە و ڕەتیانکردووەتەوە هیچ بڕیارێکی لەوشێوەیە درابێت.

 

شاخەوان عەبدوڵا، ئەندامی لیژنەی ئاساییکردنەوەی دۆخی کەرکوک و پەرلەمانتاری پێشووی پارتی لە پەرلەمانی عێراق لە هەژماری خۆی لە  تۆڕی کۆمەڵایەتی فەیسبوک ڕایگەیاند: "دوێنێ هەواڵێک لە پەیجی ڕاکان سەعید بڵاوکراوەتەوە بەوەی کراوەتە پارێزگاری کەرکوک بەفەرمی".

 

ئاماژەی بەوەشکردووە: "لەدوای بڵاوکردنەوەی ئەو هەواڵە پەیوەندیمان کرد بە نوسینگەی سەرۆکوەزیرانی عێراق و ئەمینداریەتی ئەنجومەنی وەزیرانەوە ئەوەیان پشت راستکردەوە کەئەو هەواڵە هیچ بنەمایەکی نییەو دوورە لەراستییەوە".

 

ئەو ئەندامەی لیژنەی ئاساییکردنەوەی دۆخی کەرکوک دەشڵێت: "ئێمە لەرابردووش دانمان بە ڕاکان سەعید نەناوە وەکو پارێزگاری بەوەکالەت و هەموو هەنگاوێکیش دەنێين بۆ ئەوەی باجی ئەو تاوانانە بداتەوە کە لەدوای 16ی ئۆکتۆبەر ئەنجامی داوە، دووپاتیشی دەکەینەوە هەموو ئەو بڕیارە نایاساییانەی لەلایەن ناوبراو دراوە هەڵدەوەشێتەوە وهیچ بەهایەکی یاساییان نییە".