گه‌ڕان

Shadow Shadow
سیاسه‌تی

رونکردنەوەیەک لە وەزارەتی تەندروستییەوە لەبارەی کارگەی ئۆکسجینی سلێمانی

2020.06.11 - 18:51
رونکردنەوەیەک لە وەزارەتی تەندروستییەوە لەبارەی کارگەی ئۆکسجینی سلێمانی

ناس کورد-

وەزارەتی تەندروستیی هەریم لەبارەی پشتگوێخستنی کارگەی بەرهەمهینانی ئۆکسجین لەشاری سلێمانی رونکردنەوەیەکی بڵاوکردەوە و ڕایگەیاند، ئەو هەواڵانە دوورن لەڕاستییەوە  و پێسویستە سوپاسی وەزارەتی تەندروستی و حکومەت بکرێت، نەوەک کارەکان بەکەم سەیر بکرێن.

 

لە ڕونکردنەوەیەکدا محەمەد قادر خۆشناو، وتەبێژی وەزارەتی تەندروستیی هەرێم ڕایگەیاند: "دوای بڵاوبوونەوەی هەواڵێک سەبارەت بە کارگەی بەرهەمهێنانی ئۆکسجینی سلێمانی کە گوایە پەراوێز خراوە، بە پێوستی دەزانین بۆ هاوڵاتییانی روون بکەینەوە کە تەواوی هەواڵەکە دوورە لەراستی".

 

ئاماژەی بەوەشکردووە: "دوای بەدواچوونمان و پەیوەندیکردنمان بە بەڕێوەبەری گشتیی تەندروستیی سلێمانی، ئەو رایگەیاند کە تەنها پارچەی یەدەگی (پستۆن)ی پێویستە و لە وڵاتی ئەمەریکا دەهێنرێت و ئۆردەرو دەرخستەی بۆ کراوە، کێشەکە کێشەی دابینکردنی خەرجی و پارەی (٢٦) نیە بەڵکو تەنها کێشەی کاتە و پێویستی بە نزیکەی ٢٠ رۆژ هەیە تاوەکو لەلایەن کۆمپانیای پەیوەندیدار دەگاتە هەرێمی کوردستان".

 

وتەبێژی وەزارەتی تەندروستیی ئەوەشی خستووەتەڕوو: " پێویستە سوپاس و ستایشی وەزارەتی تەندروستی و وەزارەتی دارایی و حکومەتی هەرێمی کوردستان بکرێت کە بە تەرخانکردنی چەندین ملیار دینار تائێستاش بەردەوامە لە فەراهەم کردنی خزمەتگوزارییەکانی تەندروستی بۆ هاولاتییانی خۆشەویست، نەوەک بەکەمزانین و تەسککردنەوەی کار و چالاکییەکانی تیمە تەندروستییەکان لە نەخۆشخانەکان".

 

لە ڕونکردنەوەکەدا ئەوەش هاتووە: " پێویست بوو پێش کردنی ئەم جۆرە قسانە بە دواداچوونیان بکردایە بۆ ئەوەی بزانن چۆن بەشەو و بەرۆژ و لەماوەی پشووشدا خزمەتەکان بەردەوامن، نەوەک بە لارێدابردن و بەهەڵەگەیاندنی زانیاریەکان بۆ رای گشتی".

 

جەختیشیکردووەتەوە: " ئومێدەوارین هاوڵاتییانی خۆشەویست باوەر بەم هەواڵە ناڕاستانە نەکەن و بەردەوام بن لە پابەند بوون بە رێنماییە تەندروستی و خۆپارێزیەکان، لەهەمان کاتدا وەزارەتی تەندروستی لەریگەی لیژنەی پسپۆرییەوە بەدواداچوونی زیاتر بۆ ئەو دۆسییەیە دەکات".

 

ئەوە لەکاتێکدایە، لە چەند ڕۆژی ڕابردوودا سەرۆکی ئەنجومەنی پارێزگای سلێمانی و چەند ئەندامێکی ئەنجومەنەکە سەردانی کارگەی بەرهەمهێنانی ئۆکسجینی پزیشکییان لەشاری سلێمانی کرد و ڕایانگەیاند، کارگەکە ٪٢٥ی کاردەکات و پێویستی بە ٢٦ ملیۆن دینار هەیە بۆ چاککردنەوە و خستنەوەکاری ٪٧٥ەکەی دیکەی.