گه‌ڕان

Shadow Shadow
سیاسه‌تی

’هەڵمەتی بەدادگایگەیاندنی دەستی پێكرد’ 

دادوەرێكی ئێرانی بەپارەیەكی زۆرەوە بەرەو ئەڵمانیا هەڵهات

2020.06.11 - 11:09
دادوەرێكی ئێرانی بەپارەیەكی زۆرەوە بەرەو ئەڵمانیا هەڵهات

ناس کورد- 

دادوەرێكی ئێرانی كە ئێستا لەئەڵمانیایە، لەگرتەیەكی ڤیدیۆیدا ڕەتیدەكاتەوە لەوڵاتەكەی هەڵهاتبێت و ئاماژەى بەوە کرد کە بۆ چارەسەر خۆی گەیاندووەتە ئەو وڵاتە، چالاكان و ڕۆژنامەنووسانی ئێرانیش لەتاراوگە هەڵمەتێكیان بۆ دادگایكردنی بەتۆمەتی تێوەگلانى لە پیشێلکردنى مافەکانى مرۆڤ و ڕۆژنامەنووسان دەستپێكردووە و داواكاری گشتی ئێرانیش دەڵێت، ئەو دادوەرە بەگەندەڵی تێوە گلاوە و لەترسدا هەڵهاتووە و فەرمانی گرتنیشی بۆ دەركراوە.

 

دادوەرێكی شانازیكەر

لەوەڵامی ئەو تۆمەتانەدا كە دەخرێنە پاڵی، غوڵام ڕەزا مەنسوری لەگرتەیەكی ڤیدیۆیدا دەڵێت، ئەو هەڵنەهاتووە بەڵكو بۆ چارەسەر چووەتە ئەڵمانیا و دوای كۆتایهاتنی قەیرانی كۆرۆنا و دەستپێكردنەوەی گەشتەكان دەگەڕێتەوە.

 

مەنسوری لەگرتە ڤیدیۆیەكەدا شانازی بەوەوە دەكات كە 30 ساڵە خزمەتی دادگای كردووە و ئێستاش دڵسۆزێكی ماندونەناسی عەلی خامنەیی ڕابەری باڵایە.

 

بەرتیلی وەرگرتووە

ڕۆژی یەكشەممەی ڕابردوو داوكاری گشتی ئێران مەنسوری بەوەرگرتنی 500 هەزار یۆرۆ و هەڵهاتنی بۆ دەرەوەی وڵات تۆمەتبار كرد و فەرمانی دەستگیركردنیشی بۆ دەركرد.

 

لای خۆشیەوە، كاوە موسەوی كە پیشەی پارێزەرە و هاوڵاتی بەریتانیی بەڕەگەز ئێرانیە ڕایگەیاند، سكاڵا لەدژی مەنسوری تۆمار دەكەن و داوا لەئێرانیەكانیش دەكەن بەڵگەكانیان لەدژی كۆبكەنەوە بەتایبەتی ئەوانەی كە پەیوەندییان بەتاوانەكانی و ئەو كارانەی لەدژی هاووڵاتیان و ڕۆژنامەنوسان ئەنجامیداوە.

لای خۆشیەوە شادیە سەدر، بەڕێوبەری ڕێكخراوی (دادپەروەری لەپێناو ئێراندا) ڕایگەیاندووە، بەڵگە لەدژی ئەو دادوەرەی ئێران كۆدەكەنەوە بۆ ئەوەی بیدەن بەدادگا چەندین هاووڵاتی ئێرانیش سكاڵانامەیان داوەتە دەسەڵاتدارانی ئەلمانیا بۆ دادگایگەیاندنی غوڵام مەنسوری و باسیان لەوە كردووە بەنهێنی و بەڤیزای ئیتاڵیا مانگی ئابی 2019 هاتووەتە ئیتاڵیا.

فەرمانی دەستگیركردنی 20 ڕۆژنامەنووس

چالاكان و ڕۆژنامەنوسانی ئیرانی لەتاراوگە باس لەوە دەكەن مەنسوری فەرمانی بۆ دەستگیركردنی 20 ڕۆژنامەنووس لەیەك ڕۆژدا لەمانگی شوبانی 2013 دەركردووە ولەسەر فەرمانی ئەویش هێزە ئەمنیەكان هەڵیانكوتاوەتە سەر نوسینگەی ڕۆژنامەنوسان و بەچەندین تۆمەت دەستگیركراون.

 

ئەكبەر مونتەجبی ڕۆژنامەنوس لەتوێتێكیدا دەڵێت، ساڵی 2013 مەنسوری تۆمەتێكی ئاڕاستەكردووە و هێشتا دۆسییەكە ماوە و بەكەفالەت ئازاد كراوە.

 

پۆریا عالمی ڕۆژنامەنوسێكی دیكە و ڕەخنەگرێكی دیكەیە ڕایگەیاندووە، ساڵی 2013 مەنسوری لەیەك هەفتەدا فەرمانی دەستگیركردنی بۆ 20 ڕۆژنامەنوس كە ئەویشی تێدابووە دەركردووە.

 

ئاماژەی بۆ ئەوەش كردووە، ناوی ئەو دادوەرەش لەدۆسییەكی داوكاری گشتیدا هاتووە لەسەر كەیسی گەندەڵی دادگا و چەند دۆسییەكی دیكەدا.