گه‌ڕان

Shadow Shadow
سیاسه‌تی

لیژنەى باڵاى روبەڕوبونەوەى کۆرۆنا چەند بڕیارێکى دەرکرد.. بەستنى دەمامک بەزۆر بسەپێنرێت

2020.06.10 - 17:51
لیژنەى باڵاى روبەڕوبونەوەى کۆرۆنا چەند بڕیارێکى دەرکرد.. بەستنى دەمامک بەزۆر بسەپێنرێت

ناس کورد-

لیژنەى باڵاى روبەڕوبونەوەى ڤایرۆسى کۆرۆنا بەسەرۆکایەتى مەسرور بارزانى، سەرۆکى حکومەتى هەرێم کۆبۆوە و تیایدا چەند بڕیارێک دەرکرا کە یەکێک لە بڕیارەکان سەپاندنى بەزۆرى بەستنى دەمامکە بەسەر هاووڵاتیان و هۆشدارى ئەوە دەدات هەر کەس نەیکات سزا دەدرێت.

 

لە راگەیەندراوى کۆبوونەوەى لیژنەکەدا ئاماژە بەوە کراوە  کە جەخت لەسەر بەردەوامبوون لە ڕێکارەکانی خۆپارێزی و کەرەنتینەکردن و چارەسەرکردن و پێشکەشکردنی خزمەتگوزاریی تەندروستی بۆ تووشبووان و بەرکەوتووان و گەشتیاران و چڕکردنەوەی هەڵمەتی هۆشیاریی تەندروستی خۆپارێزی لە ڤایرۆسی کۆرۆنا و بەدواداچوونی جێبەجێکردنی ڕێنماییە تەندروستییەکان لەلایەن هاووڵاتییانەوە، کراوەتەوە.

 

هەروەها بڕیاردراوە بە خەرجکردنی قۆناغێکی دیکەی بودجەی تایبەت بە خەرجییەکانی ڕووبەڕووبوونەوەی ڤایرۆسی کۆرۆنا بە بڕی پێنج ملیار دینار بۆ وەزارەتی تەندروستی بە مەبەستی دابەشکردنی بەسەر دامەزراوە تەندروستییەکانی پارێزگا و ئیدارە سەربەخۆکانی هەرێم.

 

هاوکات لە کۆبوونەوەکەدا جەخت لەسەر بەردەوامبوونی قەدەغەی هاتووچۆ لە نێوان پارێزگاکان و ئیدارە سەربەخۆکانی هەرێمـی کوردستان و توندترکردنی ڕێکارەکانی خۆپارێزی ئەم قەدەغەیە لە نێوان هەرێمـی کوردستان و پارێزگاکانی عێـراق و ڕاسپاردنی هەردوو وەزارەتی کاروباری پێشمەرگە و ناوخۆ بۆ ڕێکخستنەوەی دەوامی هێزەکانی پێشمەرگە و هێزەکانی ئاسایشی ناوخۆ بەتایبەتی ئەوانەی دانیشتووی دەرەوەی شوێنی وەزیفەکانیانن بە جۆرێک بتوانرێ کەمتـرین هاتووچۆ و بەریەککەوتن هەبێت، و هەمان شت ڕەچاو بکرێت لەلایەن وەزارەت و لایەنەکانی دیکە بۆ فەرمانبەران و کارمەندانی وەزارەتەکانیان کە نیشتەجێی دەرەوەی شوێنی وەزیفەکانیانن.