گه‌ڕان

Shadow Shadow
سیاسه‌تی

تەندروستی جیهانی بۆ ناس کورد: سیناریۆی ئێران و ئیتاڵیا لە عێراق دووبارە دەبێتەوە

2020.06.10 - 09:08
تەندروستی جیهانی بۆ ناس کورد: سیناریۆی ئێران و ئیتاڵیا لە عێراق دووبارە دەبێتەوە

ناس کورد-

نوێنەری ڕێکخراوی تەندروستی جیهانی لە عێراق هۆشداری دا لە دووبارەبوونەوەى سیناریۆی قوربانیانی کۆرۆنای ئیتاڵیا و ئێران لە عێراق.

 

ئەمڕۆ چوارشەممە، 10ی حوزەیرانی 2020، ئەدهەم ئیسماعیل، نوێنەری ڕێکخراوەکە لە عێراق بە ناس کوردی وت، "ئەگەری هەیە سیناریۆی قوربانیانی کۆرۆنا لە ئیتاڵیا و ئیسپانیا و ئێران لە عێراق دووبارەبێتەوە بەهۆی پابەندنەبوونی هاوڵاتیان بە ڕێکارەکانی خۆپارێزی لەدژی پەتای کۆرۆنا."

 

هاوکات داواشی کرد "ڕێکاری تایبەت بگیرێتەبەر بۆ دورخستنەوەى عێراق لەو سیناریۆیە" و ڕەخنەشی لە هەوڵەکانی لابردنی قەدەغەی هاتوچۆ گرت.

 

پێشتر فەلاح ساعیدی، شارەزای پێشوو لە ڕێکخراوی خاچی سوری نێودەوڵەتی هۆشداری دا لە "کارەساتێکی پەتایی" کە توشی عێراق دەبێت بەهۆی قەدەغەی هاتوچۆوە.

 

ساعیدی وتی، ئەوەى "لە عێراق دەگوزەرێت بە تایبەت لە بەغدا قەدەغەی ئەمنییە و قەدەغەی تەندروستی نییە، ئەوەش دەبێتەهۆی کارەساتێکی پەتایی و توشبووانیش دەیان هەزار تێدەپەڕێنێت."

 

ئاماژەى بەوەشکرد، "جیاوازی نێوان قەدەغەی ئەمنی لە قەدەغەی تەندروستی ئەوەیە ناوچەکانی نیشتەجێبوون گەمارۆدراون و ڕێگا سەرەکییەکان گیراون و هێزی ئەمنی تێدا بڵاوەپێکراوە، هەمان ئەو کارەش کراوە لە بەغدا."

 

وتیشی، "بەڵام قەدەغەی تەندروستی بریتییە لە شکاندنی گەمارۆی گەڕەکەکان و چاودێریکردن و ڕێگریکردنی لە کۆبوونەوەکان و قەرەباڵغی" بەڵام "خنکاندنی ناوچە شەعبییەکان دەبێتەهۆی تەقینەوەیەکی پەتایی، ئەگەر ڕێکارەکانیش بەردەوام بێت بەمزوانە دەیبینین."

 

جەختیکردەوە کە "باشترە ڕێگە بە هاتوچۆی ئۆتۆمبێل بدرێت لە ڕێگا سەرەکییەکاندا بەڵام هاوڵاتیان پابەندی ڕێکارەکانی خۆپارێزی بن و دەمامک و دەستکێش بەکاربهێنن، پێویستە سزای توندیش بۆ سەرپێچیکاران دابنرێت."