گه‌ڕان

Shadow Shadow
سیاسه‌تی

75%ى توشبووان لە قۆناغى دووەمدا توشبوون

وەزیرى تەندروستى: هێشتا زووە بۆ ئەوەى نەهێڵین کۆرۆنا لەکۆنتڕۆڵ دەربچێت

2020.06.09 - 14:12
وەزیرى تەندروستى: هێشتا زووە بۆ ئەوەى نەهێڵین کۆرۆنا لەکۆنتڕۆڵ دەربچێت

ناس کورد-

وەزیرى تەندروستى حکومەتى هەرێمى کوردستان ڕایگەیاند، هێشتا زووە بۆ ئەوەى نەهێڵن کۆرۆنا لەکۆنتڕۆڵ دەربچێت، لەکاتێکدا بەشێوەیەکى خێرا لە تەشەنەسەندندایە.

 

سامان بەرزنجى، وەزیرى تەندروستى لە کۆنفرانسێکى رۆژنامەنوسیدا ڕایگەیاند "75%ى توشبووان لە قۆناغى دووەمدا توشبوون، ئەمە دەریدەخات کە رێژەى گواستنەوەى ڤایرۆسەکە زۆر خێرایە".

 

وتیشى "توشبوون لەناو ئەوانەدا زۆرە کە هەڵگرى نیشانەکانن و زۆرێکیان خۆیان دێنە نەخۆشخانەکان، رێژەى توشبووان زۆر زیاترە لەوانەى چاکدەبنەوە".

 

وەزیرى تەندروستى باسى لەوەشکرد، ئەمڕۆ 33 حاڵەتى نوێى توشبوون تۆمارکراوە و حاڵەتى زیاتریش تۆماردەکرێت، رێژەى مردنیش زیادبووە و گەیشتووەتە 2%.

 

جەختیشیکردەوە، راگرتنى ئەم ئاستى تەشەنەسەندنە زۆر گرنگە "هێشتا زووە بۆ ئەوەى ڕایبگرین و نەهێڵین زیاتر بڵاوبێتەوە و لە کۆنتڕۆڵى سیستەمى تەندروستى دەربچێت".

 

وەزیرى تەندروستى ئەوەشى خستەڕوو، لە لیژنەى باڵاى کۆرۆنا تاوتوێی سەرجەم رێوشوێنەکان دەکەن.

 

لە وەڵامى پرسیارێکدا سەبارەت بەوەى ئەمجارە کۆرۆنا "بە ئەنقەسەت" بڵاوکرابێتەوە، وەزیرى تەندروستى وتى "ئەوەمان نەبیستووە لەسەر ئاستى جیهان و هەرێم و شارێک کە بەئەنقەست بووبێت، ئەمە ناچێتە جێگەى باوەڕى کەسەوە، بەداخەوە بۆ ئەوانەى ئەم بابەتە بەلارێدا دەبەن، هاووڵاتیش لەوەدا زەرەرمەندى سەرەکى دەبێت کە بێمتمانەیی دروستدەکرێت".