گه‌ڕان

Shadow Shadow
سیاسه‌تی

مەسعود بارزانی: شانازی بۆ ئەو لایەنانەی بەشداربوون لە ڕیفراندۆم و پەشیمانیش نەبوونەوە

2020.06.07 - 16:44
مەسعود بارزانی: شانازی بۆ ئەو لایەنانەی بەشداربوون لە ڕیفراندۆم و پەشیمانیش نەبوونەوە

ناس کورد-

سەرۆکی پێشووی هەرێمی کوردستان بەبۆنەی سێیەمین ساڵڕۆژی بڕیاردانى ئەنجامدانی ڕیفراندۆمی هەرێمی کوردستان پەیامێکی بڵاوکردەوە و ڕایگەیاند، شانازی بۆ هەموو ئەو لایەنانەی كە بەشدار بوون لە دەركردنی ئەو بڕیارە و لێشی پەشیمان نەبوونەوە.

 

لە پەیامێکدا مەسعود بارزانی، سەرۆکی پارتی دیموکراتی کوردستان و سەرۆکی پێشووی هەرێمی کوردستان ڕایگەیاند: "ئەمڕۆ  یادی ڕۆژێكی مێژووییە لە ژیانی سیاسیی گەلی كوردستان، لە 7ـی حوزەیرانی 2017ـدا لایەنە سیاسییەكانی هەرێمی كوردستان بە كۆدەنگی بڕیاریان لەسەر ڕیفراندۆمدا بۆ ئەوەی گەلی كوردستان بتوانێ لە ڕێگەیەكی ئاشتییانە دەنگ و ویستی خۆی بە جیهانیان بگەیەنێت".

 

ئاماژەی بەوەشکردووە: " ئەم بڕیارە دەستكەوتێكی گرانبەها بوو بۆ هەموو هاووڵاتیانی كوردستان و شانازیش بۆ هەموو ئەو لایەنانەی كە بەشدار بوون لە دەركردنی ئەو بڕیارە و لێشی پەشیمان نەبوونەوە".

 

مەسعود بارزانی کە لەکاتی ئەنجامدانی ڕیفراندۆمدا سەرۆکی هەرێمی کوردستان و کارەکتەری سەرەکی ڕیفراندۆم بوو، ئەوەشی خستووەتەڕوو: "لەم یادەدا پێزانینم بۆ ڕۆڵ و ماندوبونی سەرجەم تێكۆشەر و ئازادیخواز و نیشتیمانپەروەرانی كوردستان هەیە و هەزاران سڵاو لە ڕۆحی پاكی شەهیدانی كوردستان و هەموو شەهیدانی ڕێگەی ئازادی".

 

 

 ڕۆژى 7ى حوزەیرانى 2017بەشێک لەلایەنە سیاسیەکانى هەرێمى کوردستان کۆبوونەوە و بڕیارى ئەنجامدانى ریفراندۆمى سەربەخۆیى کوردستانیاندا و لە ڕۆژى 25ى حوزەیرانى ئەو ساڵەدا ریفراندۆم ئەنجامدرا و لێکەوتەى ریفراندۆمەکە بەشێکى زۆر لە خاکى هەرێمى کوردستان لە شارى کەرکوک و دەوروبەرى کەوتەوە ژێر دەسەڵاتى حکومەتى عێراق و هێزەکانى پێشمەرگە لەو شارە و لەو ناوچانەى کە بەناوچەى جێناکۆک ناسراوون دورخرانەوە و دواتر لایەنە سیاسییەکانى بەشدارى ریفراندۆمەکە یەکتریان بە هۆکارى ئەو لێکەوتە خراپانە تۆمەتبار کرد.