گه‌ڕان

Shadow Shadow
سیاسه‌تی

تاران چی لە حەشدی شەعبی دەوێت؟

ڕۆژنامەیەکی حزبوڵا دیوە شاراوەکانی سەردانەکەى قائانی بۆ بەغدا ئاشکرا دەکات

2020.06.06 - 16:33
ڕۆژنامەیەکی حزبوڵا دیوە شاراوەکانی سەردانەکەى قائانی بۆ بەغدا ئاشکرا دەکات

ناس کورد-

ڕۆژنامەی ئەخباری لوبنانی سەر بە  حزبوڵا تیشکى خستووەتە سەر دووەمین سەردانی ئیسماعیل قائانی، فەرماندەی فەیلەقی قودس بۆ بەغدا و ئاماژەى بەوەکردووە، جێگرەوەى سولەیمانى چاوى بە سەرکردەکانى حەشدى شەعبى کەوتووە و وەڵامى ئەو پرسیارانەى داوەتەوە کە زۆرترین کێشە و مشتومڕیان لەسەرە.

 

بەپێی ڕۆژنامەكە، سەردانەكەی ئیسماعیل قائانی بۆ بەغدا كە دوو ڕۆژی پێچووە دووەمین سەردانیەتی لەوكاتەوەی كە وەكو جێگرەوەی قاسم سولەیمانی دیاریكراوە، چەندین ئاماژەی لەخۆگرتووە بەتایبەت بەشێك بووە لەشاندی ئێرانی بە سەرۆكایەتی ڕەزا ئەركادینیان، وەزیری وزەی ئێرانی كە چەندین بەرپرسی باڵای عێراقیان بینیوە، ئەوان بە ڤیزای فەرمی سەردانەكەیان ئەنجامداوە بۆ لای سەركردەكانی ماڵی شیعەكانی عێراق.

 

وەڵامى پرسیارە ئاڵۆزەکان

لە سەردانەكەیدا بۆ لای دەستەی حەشدی شەعبی، قائانی وەڵامی چەند پرسیارێكی ئاڵۆزی دایەوە كە تاران بەدیاریكراوی چی لە حەشدی شەعبی دەوێت، بەتایبەت دوای ئەو تۆمەتانەی كە ئاڕاستەی سەركردەكانی قودس دەكرێت بەوەی دەیانەوێت حەشد وەلائی ئێرانی هەبێت.

 

 ئەخباری لوبنانی باسی لەوەشكردووە، قائانی لە سەردانەكەیدا بۆلای دەستەی حەشدی شەعبی جەختی لەوە كردووەتەوە، حەشدی حەشدی عێراقییە و ئەوەشی لە سەردانەكەی یەكەمیشدا وتووە و ئەو لەدۆخەكەش هەڵنەهاتووە، بەڵكو داوای كردووە بەئارامی و عەقڵێكی ساردەوە چارەسەری كێشەكان بكرێت و زیاد لە جارێكیش وتویەتی حەشد، حەشدی مەرجەعیەتی باڵایە و تارانیش پشتیوانی ئەو حەشدە دەكات و نایەوێت خۆی بئاڵێنێتە كێشە ناوخۆییەكانەوە و دەیەوێت دیدە ناكۆكان لێكتر نزیك بكاتەوە گەر داوای لێكرا.

 

 بەوتەی ڕۆژنامەكەی نزیك لە حەسەن نەسروڵا، وتەكانی قائانی لەجەختكردنەوەی ڕۆڵی حەشدی شەعبی بەدەر لە دیمەنی سیاسی عیراقی نەبووە كە جارێكی تر ئەوەی دووپاتكردووەتەوە ئێران ڕەتیدەكاتەوە دەستوەردان لەكاروباری ناوخۆی عێراقدا بكات بەدانانی كەسانی دیاریكراو لەدۆسییەكانی تایبەت بەعێراقدا بۆ حوكمڕانی.

 

وەك ئەو وتەیەی كە باسی دانانی مستەفا كازمی كردووە كە ڕایگەیاندووە ناوبراو بژاردەی ئیران نییە و خودی عێراقیەكان هەڵیانبژاردووە و ئەوانیش لێی بەرپرسن و سەركەوتنی بۆ قازانجی هەردوو وڵاتە و شكستهێنانیشی  ئامانجی پێچەوانەوەی لێدەكەوێتەوە.



ئاماژەکانى سەردانەکە

بەپێی ڕۆژنامەكە، سەردانەكەی قائانی لەم كاتە و دۆخەدا چەند ئاماژەیەكیان لێدەخوێنرێتەوە كە ئەمانەی لای خوارەوەن:

 

- چەند ڕۆژێك پیش تەواوكردنی كابینە وەزارییەكەی كازمییە، ئاماژەیەكە بۆ ئەوەی پشتیوانی تەواوكردنی كابینەكەی دەكرێت لەلایەن تارانەوە.



- چەند ڕۆژێك پێش دەستپێكردنی دانوستانە ستراتیژییەكانی عێراق ئەمریكایە، سەردانەکە وەک پێشوازییەكی نهێنیانە وایە و دەرخەری ئەوەیە هەندێك لە ئێرانییەكان كۆڵیان نەداوە لەدەركردنی هێزەكانی ئەمریكا لەناوچەی خۆرئاوای ئاسیا بەڵام بەڕێگایەكی سیاسی و بژاردەی یەكەمیش كاریگەرترینیانە.

 

- سەردانەكەی فەیلەقی قودس و بۆچوونەكانی لەبارەی دۆسییەكانی عێراقەوە بەشێكە لە سیستمی حوكمی ئێرانی و بەوەش قۆناغێكی تری پەیوەندی كردن لەنێوان تاران و بەغدا سەرهەڵدەدات.

 

- سەردانەكە هەڵگری پەیامێكی ئێرانیە بۆ پێویستی گوێگرتن لە خواستی عێراقیەكان و كاركردن بۆ خاوکردنەوەى دۆخەكەیان و ڕەتكردنەوەی تارانیش بۆ دەستوەردان لە قەیرانەكانی عێراقدا بەڵكو تەنها كاركردن بۆ نزیككردنەوەی دیدو بۆچونی یەكتر لەسەر جیاوازییەكان.

 

ڕۆژنامەكە لەسەر زاری چەند سەرچاوەیەكی سیاسیەوە ئەوەی بڵاو كردووەتەوە، میكانیزمەكانی مامەڵكردنی ئێستای سوپای قودس جیاوازە لە ڕابردوو، بەوپێیەی دۆخەكە گۆڕانكاری بەسەردا هاتووە و جیاوازە لەو ڕێوشوێنانەی كە پێشتر قاسمی سولەیمانی گرتویەتیە بەر.