گه‌ڕان

Shadow Shadow
سیاسه‌تی

’’ئێمە کە بەشدار نین لە کابینەکە هەموو هەوڵێک دەدەین’’

گۆڕان دەنگ بە وەزیرەکانی پارتی و یەکێتی و کابینەکەى کازمی نادات

2020.06.06 - 13:53
گۆڕان دەنگ بە وەزیرەکانی پارتی و یەکێتی و کابینەکەى کازمی نادات

ناس کورد-

فراکسێۆنی گۆڕان لە پەرلەمانی عێراق ڕایگەیاند، لە دانیشتنی بەخشینی متمانە بە کابینەکەی مستەفا کازمی دەنگیان بە کابینەکە نەداوە و ئەمڕۆش کە بڕگەیەکی دانیشتنی پەرلەمان تایبەتە بە تەواوکردنی ئەو کابینەیە "جەخت لە هەمان هەڵوێست دەکەینەوە کە دەنگ بە هیچ کام لەو ناوانە نادەین کە بڕیارە ئەمرۆ بۆ پۆستی چەند وەزارەتێک دەنگیان پێ بدرێت."

 

لە ڕاگەیەنراوێکدا کە ئەمڕۆ شەممە، 6ی حوزەیرانی 2020 بڵاوکراوەتەوە، "ئێمە کە بەشدار نین لە کابینەکەی کازمی هەمو هەوڵێک دەخەینەگەڕ بۆ زیندوو ڕاگرتنی مافە دەستوریەکانی خەڵکی هەرێم بەتایبەت جەخت لەوە دەکەینەوە کە هەردوو حکومەت بە خێرایی بگەنە ڕێکەوتن سەبارەت بە دۆسێی نەوت و داهات و چیتر موچەی فەرمانبەرانی هەرێم و مافەکانی پێشمەرگە و شایستە داراییەکانی جوتیاران نەبێتە قوربانی نێوانیان."

 

دەشڵێت، "ئێمە لە فراکسێۆنی گۆڕان پێمان وایە بەشداریکردن لە حکومەتی فیدراڵ دەبێ پرسێکی نیشتیمانی بێ نەک حزبی و شەخسی و لە دانوستانیشدا لەبری پچڕاندنی پۆست و پایە بۆ کەسێک، مافە دەستوریەکانی خەڵکی کوردستان ئەولەویەتیان هەبێت، بەتایبەت کێشەی ناوچە جێناکۆکەکان و پرسی دابەشکردنی داهات لەنیوان هەرێم و حکومەتی فیدراڵ و پاشان بەشداریەکی هاوسەنگ لە حکومەتدا نەک کورتکردنەوەی هەمو ئەوانە لە یەک پۆست و یەک تاکە کەسدا."

 

ئاماژەى بەوەشکردووە، "وەک فراکسێۆنی گۆڕان بە توندی دژی ئەو نەریتە سیاسیەی بەشێک لە هێزە سیاسیە کوردستانیەکان دەوەستینەوە کە پرسی بەشداریکردن لە حکومەتی فیدراڵی عێراق لە مەسەلەیەکی نشتیمانی فراوانەوە بۆ ویستیكی حزبی و لەناو حزبیشدا بۆ ئەجێندایەکی تاکە کەسی بچوک دەکەنەوە و هەمو داواکاریان دەبێتە ئەوەی کەسێک وەک تاکە کاندید دەبێ بکرێتە وەزیر و لەو پێناوەشدا سازش لەسەر تێکرای مافە دەستوریەکانی خەڵکی کوردستان دەکەن و ناچار بە چەندین رێکەوتن و بەندوباوی ژێر بەژێر دەبن بۆ تێپەراندی کاندیدە کەسی و حزبیەکانیان."