گه‌ڕان

Shadow Shadow
سیاسه‌تی

’15 پەرلەمانتاری کورد دەنگی پێ نادەن’

پەرلەمانتارێکى کورد کاندیدکردنی فوئاد حسێن بۆ وەزارەتی دەرەوە بە کارەسات ناودەبات

2020.06.05 - 13:28
پەرلەمانتارێکى کورد کاندیدکردنی فوئاد حسێن بۆ وەزارەتی دەرەوە بە کارەسات ناودەبات

ناس کورد-

ئەندامێکی فراکسیۆنی ئایندە لە پەرلەمانی عێراق، هۆشداریدا بە پەرلەمانتارە عەرەبەکانی پەرلەمانی عێراق لەوەی ڕێگەنەدەن بە فوئاد حسێن پۆستی وەزارەتی دەرەوە عێراق وەربگرێت، دەشڵێت، ناوبراو عێراق بەدوژمنی هەرێمی کوردستان دەزانێت، بۆیە 15 پەرلەمانتاری کورد لە پەرلەمانی عێراق بڕیاریانداوە دەنگی پێ نەدەن.

 

ئەمڕۆ (هەینی، 5ی حوزەیرانی 2020) سەرکەوت شەمسەدین، ئەندامى پەرلەمانی عێراق لە فراکسیۆنی ئایندە دەربارەی کاندیدکردنی فوئاد حسێن لەلایەن پارتییەوە بۆ وەرگرتنی پۆستی وەزیری دەرەوەی عێراق کە بڕیارە پەرلەمانی عێراق سبەی (شەممە) بۆ تەواوکردنی کابینەکەی کازمی کۆببێتەوە، هاتە دەنگ و لە ڕاگەیاندراوێکدا وتی :" کاندیدکردنی فوئاد حسێن بۆ پۆستی دەرەوەی عێراق کارەساتە".

 

وتیشی :"ناوبراو عێراق بە دوژمنی هەرێمی کوردستان دەزانێت، ڕێگەدان بەوەی کە ئەو کەسە وەزارەتی دەرەوەی عێراق وەربگرێت بەرپرسیارێتییەکەی دەکەوێتە ئەستۆی ئەو پەرلەمانتارانەی کە نوێنەڕایەتی ناوچەکانی ناوەڕاست و باشوری عێراق دەکەن".    

 

سەرکەوت شەمسەدین، ئاماژەى بەوە کردووە "ئەگەر لە حاڵەتێکدا لایەنە سیاسییەکان دەنگ بە فوئاد حسێن بدەن ئەوا دەبێت بەدڵنیاییەوە بزانین کە ڕێککەوتنێکی ژێربەژێر لە نێوانیاندا کراوە بەبێ ڕەچاوکردنی ڕەهەندە نیشتمانییەکان"

 

پەرلەمانتارەکەی فراکسیۆنى ئایندە لە پەرلەمانی عێراق ئەوەشی خستەڕوو "فوئاد حسێن دووکەوتەی حیزبەکەی خۆیەتی و فەرمانەکانی پارتی دیموکراتی کوردستان جێبەجێدەکات وپێشتریش عێراقی بە دوژمنی هەرێمی کوردستان ناوبردووە".

 

بەبڕوای سەرکەوت شەمسەدین "ڕادەستکردنی سیاسەتی دەرەوەی عێراق بە کەسێکی وەک فوئاد حسێن لەم دۆخە هەستیارەدا مەحاڵە و کارەساتە، چونکە ناوبراو بەتەواوەتی کۆتایی پێدەهێنێت".

 پەرلەمانتارەکەی فراکسیۆنی ئایندە لە پەرلەمانی عێراق، لە ڕاگەیەندراوەکەدا داوای کردووە  "پۆستێکی سیادیی و هەستیار لەو شێوەیە دەبێت بدرێت بە کەسایەتییەکی کوردی بێلایەن کە دوربێت لە جێبەجێکردنی ئەجندایەکی تەمومژاوی تایبەت بەحزبێک".

 

سەرکەوت شەمسەدین، لە کۆتایی ڕاگەیەندراوەکەیدا جەختیلەوەکردوەتەوە "کە لە دانیشتنی داهاتووی پەرلەماندا 15 پەرلەمانتاری کوردی ئۆپۆزسیۆن خۆیان یەکلایی کردوەتەوە کە بە هیچ شێوەیەک دەنگ بە فوئاد حسێن نادن بۆ ئەوەی پۆستی وەزارەتی دەرەوەی عێراق وەربگرێت".

 

 بڕیارە سبەی (شەممە) پەرلەمانی عێراق دانیشتنی خۆی سازبکات بۆ دەنگدان لەسەر تەواوکردنی کابینەکەی مستەفا کازمی، کە لە ئێستادا حەوت وەزارەتەی کابینەکەی بێ وەزیرن ولەلایەن کازمی وەزیرەکانی ترەوە بەوەکالەت بەڕێوەدەبڕین.

 

پەرلەمانی عێراق لەسەرەتای مانگی ئایاری ڕابردوودا متمانەی بە 15 وەزیری کابینەکەی کازمی بەخشی، پێنح وەزارەتیش کە پێکهاتبوون لە وەزارەتەکانی "بازرگانی، ڕۆشنبیری،کشتوکاڵ، داد و کۆچ وکۆچبەران" کاندیدەکانی ڕەتکردووە و دوو وەزارەتیش کە پێکهاتبوون لەوەزارەتەکانی (دەرەوە و نەوت) بەبێ کاندید مانەوە ئەوەش بەهۆی ڕێکنەکەوتن لەسەرکاندیدەکانیان لەلایەن پێکهاتەکانی پڕۆسەی سیاسی عێراقەوە.