گه‌ڕان

Shadow Shadow
سیاسه‌تی

بلومبێرگ: ئەردۆگان پلان بۆ دامەزراندنى هێزێکى تایبەت بە پاراستنى دادەنێت

2020.06.05 - 09:01
بلومبێرگ: ئەردۆگان پلان بۆ دامەزراندنى هێزێکى تایبەت بە پاراستنى دادەنێت

ناس کورد-

ئاژانسى بلۆمبێرگى ئەمریکى ئاشکراى کرد، حکومەتى تورکیا بە سەرۆکایەتى رەجەب تەیب ئەردۆگان، پلانى ئەوە دادەنێت دەسەڵاتى نوێ ببەخشرێت بە هێزێکى پۆلیسى پشتیوانى کە لە 28 هەزار کەس پێکدێت و گومان دەکرێت هێزەکە سەر بە سەرۆکى ئەو وڵاتە بێت نەک دەوڵەت.

 

بەگوێرەى پڕۆژە یاسایەک کە بۆ پێکهێنانى ئەو هێزە گەڵاڵە کراوە و پێشبینى دەکرێت لە پەرلەمان تێپەڕێنرێت، هێزە تازەکە دەسەڵاتى ئەوەیان هەیە داواى ناسنامە لە هاووڵاتیان بکەن و پشکنینى جەستەیى بۆ هاووڵاتیان بکەن. هەروەک چۆن ئامانج لە دروستکردنى ئەو هێزە بەگوێرەى پڕۆژە یاساکە پێشکەشکردنى یارمەتى و هاوکارییە دژى خۆپیشاندەران و بۆ ئەو مەبەستەش مەشق و راهێنانى پێدەکرێت.

 

لەبارەى پڕۆژە یاساکەوە، عەلى ئۆزتونک پەرلەمانتارى پارتى گەلى کۆمارى هۆشدارى ئەوەیدا کە ئەو هێزە ببێتە هێزى پاراستنى رژێمى ئەو وڵاتە و دەسەڵاتدارانى پارتى داد و گەشەپێدانى فەرمانڕەوا کە ئەردۆگان سەرۆکایەتى دەکات.

 

هاوکات محەمەد کولهاوغڵۆ پەرلەمانتارى ئۆپۆزسیۆن لەبارەى پێکهێنانى ئەو هێزە لەناو هۆڵى پەرلەمانى ئەو وڵاتە ئاشکراى کرد کە بەشێک لە میدیاکان ئاماژەیان بەوە کردووە هێزە تازەکە دەسەڵاتى ئەوەى دەدرێتێ کە لە شێوازى ژیانى خەڵک خۆیان هەڵقورتێنن هاوشێوەى پۆلیسى ئاداب لە وڵاتى ئێران.