گه‌ڕان

Shadow Shadow
وه‌رزش

دادگاى ئيسپانى سزاى زيندانیی بۆ ديێگۆ كۆستا بڕيەوە

2020.06.04 - 23:35
دادگاى ئيسپانى سزاى زيندانیی بۆ ديێگۆ كۆستا بڕيەوە

ناس کورد-

 

بەتۆمەتى خۆدزينەوە لە باج، دادگاى ئيسپانى سزاى شەش مانگ زيندانى بەسەر ديێگۆ كۆستاى هێرشبەرى يانەى ئەتلەتيكۆ مەدريدى هەمان وڵات سەپاند.

 

سەرچاوەكانى هەواڵى ئيسپانى بڵاويانكردوەتەوە، كۆستا لەبەردەم دادگادا دانى ناوە بەوەدا كە خۆى لە باج دزيوەتەوە و داواكارانيش داواى شەش مانگ زيندانيان بۆكردوە و ئەو سزاشى بەسەردا سەپێنراوە، بەڵام كۆستا دەرچەيەكى دۆزيوەتەوە بۆ دەربازبون لە زيندانيكردن.

 

پێشتريش و لەماوەى جياجيادا چەندين ياريزانى ترى خولى ئيسپانى تۆمەتى خۆدزينەوە لە باجيان دراوەتە پاڵ، كۆستاش وەك ئەوانەى پێشوو خۆى لە باج بە بڕشى مليۆنێك و 14 هەزار يۆرۆ دزيوەتەوە، ئەوەش پێش شەش ساڵ و لەساڵى 2014 دا بوە.

 

بەپێى بەڵگە ياساييەكان ئەستێرەكەى ڕۆخيبلانكۆس كە تەمەنى 31 ساڵە ئەو بڕە پارەيەى كە پێنج مليۆن و 150 هەزار يۆرۆيە ئاشكرا نەكردوە كە لەكاتى گواستنەوەى لە ڕيزەكانى ئەتلەتيكۆ مەدريد بۆ چێڵسى ئينگليزى وەريگرتوە، هەروەها ئەو مليۆن يۆرۆيەى ئاشكرا نەكردوە كە بەهۆى سودوەرگرتن لە وێنەكانيەوە وەريگرتوە.

 

بەپێى زانيارى ڕۆژنامەكانى ئيسپانيا، كۆستا لەبرى بەسەربردنى شەش مانگ لە بەنديخانەدا پارە دەدات، چونكە ئەگەر بەند بكرێت ئەوا تەمەنى وەرزشى كۆتايى دێت بەتايبەتى كە ئێستا خەريكە دەبێتە 32 ساڵ.