گه‌ڕان

Shadow Shadow
سیاسه‌تی

وەزارەتى تەندروستى لێدوان لەكارمەندەكانى قەدەغە دەكات 

ژمارەى توشبوانى كۆرۆنا لە عێراق بازێكى گەورەیدا

2020.06.03 - 22:54
ژمارەى توشبوانى كۆرۆنا لە عێراق بازێكى گەورەیدا

ناس کورد-

ژمارەى توشبوانى ڕۆژانەى ڤايرۆسى كۆرۆنا لە عێراق بازێكى گەورەيدا ئەوەش دواى ئەوەى ئەمڕۆ (چوارشەممە) وەزارەتى تەندروستى ئاشكرايكرد كە 781 توشبوى نوێ تۆماركراون ئەوەش بەرزترين ڕێژەيە تائێستا لە يەك ڕۆژدا تۆمار كرابێت.

 

ژمارەى گشتى توشبوانى كۆرۆنا لەعێراق گەيشتە 8168 توشبو و پێشتريش حەسەن تەميمى، وەزيرى تەندروستى عێراق ئاماژەى بەوەدابوو كە هۆكارى بەرزبونەوەى ژمارەكان بۆ ئەوە دەگەڕێتەوە كە هاووڵاتيان ڕێنماييە تەندروستيەكان پەيڕەو ناكەن، هەروەها هۆكارێكى ترى ئەوەيە كە ژمارەى پشكنينەكان بۆ دۆزينەوەى توشبوان زيادى كردوە.

 

تەميمى پێشبينى ئەوەشى كردبوو، كە ژمارەى توشبوانى ڕۆژانە بگاتە 800 كەس و شانەى قەيرانەكانيش بڕياريداوە كە رێوشوێنەكان لە دەروازە سنوريەكان و بازگەكانى نێوان شارەكان توندوتۆڵتر بكات.

 

هەروەها وەزارەتى تەندروستى گيانلەدەستدانى 21 توشبوى ترى ڕاگەياندوە، بەوەش كۆى گشتى ئەو توشبوانەى تائێستا گيانيان لەدەستداوە گەيشتوەتە 256 كەس.

 

لەسەرەتاى بڵاوبونەوەى ڤايرۆسى كۆرۆنا لە عێراق، ڕۆژانە ژمارەكان لە 20 بۆ 50  توشبوو تێنەدەپەڕين، بەڵام لە ئێستادا ژمارەكان بەشێوەيەكى گەورە زياديان كردوە و ئەوەش بە شەپۆلى دوەمى پەتاكە دادەنرێت بەپێى وتەى شارەزايانى تەندروستى عێراقى.

 

پەتاى كۆرۆنا زيانێكى زۆرى لە ئابورى عێراق و بەشێكى گەورەى كارە بچوكەكان و كرێكاران و كەرتى تايبەت داوە، ئەوەش بەهۆى ئەو رێوشوێنانەى بۆ ڕوبەڕوبونەوەى ڤايرۆسى كۆرۆنا گيراونەتە بەر.

 

لاى خۆشيەوە پێگەى "الحرة" نوسراوێكى بڵاوكردوەتەوە كە ڕاستيەكەى پشتڕاست نەکراوەتەوە و بەپێى نوسراوەكە، وەزارەتى تەندروستى فەرمانى بە كارمەندەكانى كردوە لە نێويشياندا كارمەندە باڵاكان كە قسە بۆ ڕاگەياندنەكان نەكەن تايبەت بە بڵاوبونەوەى ڤايرۆسى كۆرۆنا لە عێراق، هەروەها هيچ ژمارەيەك تايبەت بە توشبوان ڕانەگەيەنن.

هەر بەپێى ئەو نوسراوە كە ناونيشانى "يەكخستنى وتارى ڕاگەياندن"ى پێوەيە داوا لە بریکارى وەزيرەكانيش كراوە پشت بەو سەرژمێريە ببەستن كە وتەبێژى فەرمى وەزارەتى تەندروستى بڵاويدەكاتەوە.