گه‌ڕان

Shadow Shadow
سیاسه‌تی

لە 10 ڕۆژدا ماڵپەڕی پەرلەمانی کوردستان هەشت هەواڵی هەیە کە سەرجەمیان تەشریفاتین

2020.06.03 - 15:10
لە 10 ڕۆژدا ماڵپەڕی پەرلەمانی کوردستان هەشت هەواڵی هەیە کە سەرجەمیان تەشریفاتین

ناس کورد-

میدیاى پەرلەمانى کوردستان لەلایەن بەشێک لە پەرلەمانتارانەوە روبەڕووى رەخنە دەبێتەوە، بەهۆى بڵاوکردنەوەى هەواڵى تەشریفاتییەوە لەم بارودۆخەدا کە چەندین کێشەى دارایی و تەندروستى بەرۆکى خەڵک و هەرێمى گرتووە.

 

بەپێی بەدواداچوونەکان ناس کورد، لەماوەی 10 ڕۆژدا، لە ڕێكەوتی 23ی ئایارەوە تاوەكو 3ی حوزەیران، ماڵپەڕی فەرمی پەرلەمانی كوردستان كە میدیای فەرمی ئەو دەزگایە تەشریعیە باڵایەی هەرێمە تەنها هەشت هەواڵی بڵاوكردووەتەوە هەموویان دەچنە چوارچێوەی چالاكیەكی تەشریفیاتیەوە، لەکاتێکدا لەو ماوەیەدا هەرێم رووداوى زۆرى بەخۆوە بینیوە.



كار و ئەركی بنەڕەتی هەموو پەرلەمانێك، یاسادانان و چاودێریكردن و لێپرسینەوە لە حكومەت و پەسەندكردنی بودجەی ساڵانەی حكومەتە، ئەوەش لەڕێگەی پەیوەندی گرتنی مەیدانی لەگەڵ خەڵكدا كە دەنگی بۆ ئەو پەرلەمانە داوە و كردویەتی بەنوێنەری خۆی.

 

 

هەواڵەکان کە لە ماڵپەڕی پەرلەمان بڵاوکراونەتەوە بریتین لە پەیامی  پیرۆزبایی سەرۆكی پەرلەمان بەبۆنەی ساڵیادی دامەزراندنی كۆمەڵی ئیسلامیەوە، پەیامی  یپرۆزبیای سكرتێری پەرلەمان بەبۆنەی یادی دامەزراندنی یەكێتیەوە، پەیامی پیرۆزبای جێگری سەرۆكی پەرلەمان بەبۆنەی ساڵیادی دامەزراندنی یەكێتی نیشتیمانیەوە، پەیامی پیرۆزبایی سەرۆكی پەرلەمان بەبۆنەی ساڵیادی دامەزراندنی حزبەكەیەوە.



ئەوە لەکاتێکدایە، لەو ماوەیەدا رووداوى زۆر لە هەرێم روویانداوە، لەوانە کە پەیوەندی بەژیانی خەڵك و حكومەت و دەزگاكانیەوە هەبووە، لەوانە دواکەوتنى موچە، دانوستانەکانى هەرێم و بەغدا، بەرزبوونەوەى خێراى کۆرۆنا، ناڕەزایی و خۆپیشاندان لەسەر قەدەغەى هاتوچۆ.



تەنانەت ماڵپەڕى پەرلەمانى کوردستان ڕاگەیەنراوەکەى سەرۆکى پەرلەمانیشى تێدا بلاونەکراوەتەوە، سەبارەت بە قەرزەکانى سەر حکومەت و ئەو کاردانەوانەى لەو بارەیەوە سەریانهەڵدا، سەربارى ئەوەش هیچ هەواڵێکى تێدا نییە سەبارەت بە دەستپێکردنەوەى کۆبوونەوەکانى پەرلەمان کە لەحەوتى مانگى ڕابردووەوە بەهۆى ناکۆکى نێوان لایەنەکانەوە پەکیکەوتووە.



چیا شەریف، ئەندامی لیژنەی كاروباری پەرلەمان و سكاڵا لە فراكسیۆنی پارتی بەناس كوردی ڕاگەیاند، ئەوانیش تێبینیان لەسەر هەندێ كاری تایبەت بە ڕاگەیاندنی پەرلەمان هەیە و لە دانیشتنی سەرۆكی فراكسیۆنەكاندا ئەو تێبینانە لەو بارەیەوە دەخەنە ڕوو.



وتیشی، "بڵاوكردنەوەی پەیامی پیرۆزبایی لەلایەن دەستەی سەرۆكایەتی پەرلەمانەوە بەناوی خۆیانەوە گوزارشتە لەڕاوبۆچونی خۆیان و لەوەدا ئازادن چۆن دەریدەبڕن".



بەوتەی ئەو پەرلەمانتارە، بڵاوكردنەوەی تەنها پەیامی پیرۆزبایی لەلایەن سەرۆك و جێگر و سكرتێری پەرلەمانەوە بەمانای پەكخستن و ڕاگرتنی كاری پەرلەمانتاری و دانیشتنەكانی نایەت بەڵكو پەرلەمانتار لەئەركەكانی خۆی بەردەوامە و رؤژانە لیژنەكان كاری خۆیان دەكەن.



باسی لەوەشكرد، بۆنەكانی جەژنی ڕەمەزان و قەیرانی كۆرۆناوە ڕێگری لەدانیشتنەكان كردووە ئەگینا دەستپێدەكەنەوە.



زیاتر لە دوو مانگ لە ئەنجامنەدانی دانیشتنەكانی بەپاساوی ڕێگریكردن لە ڤایرۆسی كۆرۆنا، ڕۆژی 7 ئایار بەمەبەستی وەرگرتنی پارێزبەندی لە پەرلەمانتار سۆران عومەر كۆبویەوە، ئەوەش پەرتبوونی لەنێوان دەستەی سەرۆكایەتی پەرلەماندا دروستكرد و سەرۆكی پەرلەمان بایكۆتی كۆبونەوەكەی كرد.

 

دوای گرژبونەوەی پەیوەندیەكانی یەكێتی و پارتی دوای کۆبوونەوەکە و پیشتریش بەهۆی كیشەكانی زێنی وەرتێوە، تا ئێستا پەرلەمان نەیتوانیوە دانیشتەكانی درێژە پێبدات ئەوەش بەلای پەرلەمانتارانەوە بەپەكخستنی ئەو دەزگایە وەسف دەكرێت.



دیاری ئەنوەر، ئەندامی پەرلەمان بەناس كوردی ڕاگەیاند، "ئەو وێنەیە ڕەنگدانەوەی ویست و خواستی دەستەی سەرۆكایەتی پەرلەمانی كوردستانە و لە مێژووی پەرلەمانی كوردستاندا بەم شێوەیەی ئیستا ئەو دەزگایە سڕ نەكراوە و لە ئەركەكانی پەكنەخراوە و بەهەمان شێوە میدیاكەشی ڕەنگدانەوەی دۆخەكەیەتی".



وتیشى، "سەرۆك و دەستەی سەرۆكی پەرلەمان بەهێز نین و نەیانتوانیوە بەرجەستەی كاری پەرلەمانتاری بكەن و پەرلەمان بكەنە شوێنێكی سەرەكی بۆ بڕیاردان بەڵكو بووەتە شوێنی بڕیاردانی حزبە سیاسیەكان، لۆژیك نیە پەرلەمان نەتوانێت كار لەسەر چەند دۆسیەك بكات گەر حزبەكان ڕازی نابن و نەشتوانێت كۆببێتەوە گەر حزبەكان كۆنەبنەوە و ئەوان بڕیار لەسەر كردنەوە و داخستنی بدەن ئەی ڕۆلێ دەستەی سەرۆكایەتی چیە..؟".



"بەشێك لەو كارانەی حكومەت دەیانكات هەر لەنەدانی موچە و خراپ مامەڵە كردن لەگەڵ ناڕەزایەتیەكان و پشتگوێ خستنی كیشەكانی خەڵك پەیوەندیان بەخراپی ڕۆڵی دەستەی سەرۆكایەتی پەرلەمانەوە هەیە و نەیانتوانیوە شكۆ بۆ ئەو دەزگایە بگیڕێتەوە و حكومەت بەرپرس بكات و بانگی لێكۆڵینەوەی بكات و ئەوەش لەغیابی پەرلەماندایە ئەو كارانە دەگوزەرێن" دیارى ئەنوەر وایوت.