گه‌ڕان

Shadow Shadow
سیاسه‌تی

وەزارەتی تەندروستی دەیان حاڵەتی تری کۆرۆنای لە سلێمانی ڕاگەیاند

2020.06.02 - 22:50
وەزارەتی تەندروستی دەیان حاڵەتی تری کۆرۆنای لە سلێمانی ڕاگەیاند

ناس کورد-

وەزارەتی لە بەردەوامی پشکنینەکان و گەڕان بەدوای گومانلێکراوان و تووشبووان، 35 تووشبووی دیکەی ڤایرۆسی کۆرۆنای نوێ (COVID-19) لە پارێزگای سلێمانی دەستنیشانکران، 21 پیاو و 10 ئافرەت و چوار منداڵ.

 

وەزارەتەکە دەڵێت، 11 تووشبوو بەرکەوتووی تووشبووانی پێشوون، 24 تووشبوو نیشانەی نەخۆشیان ھەیە.

 

وەزارەتەکە ژمارەى توشبووانی بەپێی قەزا و ناحییەکان بڵاوکردووەتەوە کە بەم شێوەیەن:

29 تووشبوو دانیشتووی ناو شاری سلێمانی.
یەك تووشبوو دانیشتووی پیرەمەگروون.
یەك تووشبوو دانیشتووی عەربەت.
یەك تووشبوو دانیشتووی قەزای چەمچەماڵ.
یەك تووشبوو دانیشتووی قەزای کەلار.
یەك تووشبوو دانیشتووی قەزای پێنجوین.
یەك تووشبوو دانیشتووی پارێزگای ئەنبار.

 

هەر ئەمڕۆ وەزارەتی تەندروستیی هەرێم تۆمارکردنی شەش حاڵەتی نوێی توشبوون بە کۆرۆنای لە سنوری ئیدارەی گەرمیان ڕاگەیاند و ئاماژەی بەوەشکرد، سەرجەمیان بەرکەوتەی توشبووانی پێشوون.

 

لە ڕاگەیەندراوێکدا وەزارەتی تەندروستیی هەرێم ڕایگەیاند: "لە بەردەوامی پشکنینەکان و گەڕان بەدوای گومانلێکراوان و تووشبووان، شەش تووشبووی دیکەی ڤایرۆسی کۆڕۆنای نوێ COVID-19 لە دەڤەری گەرمیان دەستنیشانکران".

 

ئاماژەی بەوەشکرد، توشبووەکان پێکهاتوون لە سێ ئافرەتی تەمەن 38 و 28 و 20 ساڵ و دوو پیاوی تەمەن 46 و 23 ساڵ و منداڵێكی تەمەن 9 ساڵ، ھەموویان بەرکەوتووی تووشبوانی پێشوون.

 

هەر ئەمڕۆ بەڕێوەبەری تەندروستیی هەولێر ڕایگەیاند، توشبوویەکی دیکەی کۆرۆنا لە هەرێمی کوردستان گیانیلەدەستدا، ئەوەش دووەمین حاڵەتی گیانلەدەستدانی ئەمڕۆیە لە هەولێر و چوارەمینە لە هەرێمی کوردستان.  

  

دلۆڤان محەمەد، بەڕێوەبەری تەندروستیی هەولێر لە کۆنگرەیەکی ڕۆژنامەوانیدا ڕایگەیاند: "توشبوویەکی دیکەی ڤایرۆسی کۆرۆنا لەشاری هەولێر گیانیلەدەستدا کە دووەم حاڵەتی گیانلەدەستدانی ئەمڕۆیە بە ڤایرۆسەکە".   

  

وتیشی، ئەو کەسە بەسەختی نیشانەکانی ڤایرۆسەکەی تێدا دەرکەوتبوو و چەند ڕۆژێکە لەژێر ئامێری هەناسەدانی دەستکردایە و بەهۆیەوە هەردوو گورچیلەی وەستا و لە کۆتاییدا گیانیلەدەستدا.  

  

ئەمە چوارەمین حاڵەتی گیانلەدەستدانی ئەمڕۆیە بە ڤایرۆسەکە لە هەرێمی کوردستان کە دووانیان لە هەولێر و کەسێک لە سلێمانی و کەسێکیش لە گەرمیان بووە.