گه‌ڕان

Shadow Shadow
سیاسه‌تی

پارتی سورە لەسەر کاندیدکردنی فواد حسێن بۆ وەزارەتی دەرەوە

2020.06.02 - 19:14
پارتی سورە لەسەر کاندیدکردنی فواد حسێن بۆ وەزارەتی دەرەوە

ناس کورد-

ئەندامێکی فراکسیۆنی پارتی لە پەرلەمانی عێراق ڕایگەیاند، حیزبەکەی سورە لەسەر کاندیدکردنی فواد حسێن بۆ وەرگرتنی پۆستی وەزیری دەرەوی عێراق، دەشڵێت، هیچ لایەنێکی سیاسی کاندیدکردنی ناوبراوی ڕەتنەکردوەتەوە.

 

بەشار کیکی، پەرلەمانتاری پارتی دیموکراتی کوردستان لە پەرلەمانی عێراق بە میدیاکانی نزیک لە حیزبەکەی ڕاگەیاندووە، "فواد حسێن تاکە کاندیدی ئەوانە بۆ وەرگرتنی پۆستی وەزارەتی دەرەوی عێراق".

 

کیکی ئاماژەی بەوەکردووە، لە دانیشتنی پەرلەمانی عێراقدا کە بڕیارە سبەی چوارشەممە سازبکرێت بۆ تەواوکردنی کابینەکەی کازمی، فراکسیۆنی پارتی ناوی فواد حسێنی ئامادە کردووە بۆئەوەی پەرلەمانی عێراق دەنگی لەسەربدات.

 

پەرلەمانتارەکەی پارتی ئەوەشی ڕەتکردەوە کە هیچ لایەنێکی سیاسی دژ بە کاندیدکردنی ناوبراو بن بۆ پۆستەکە و دەڵێت: "ئەوانەی پڕوپاگەندە دەکەن بۆ دروخستنەوەی فواد حسێن لە کابینەکەی کازمی تەنها چەند پەرلەمانتارێکن کە بیانووەکانیان بێ بنەمان وهیچ لوژێکی تێیدا نییە".

 

ئەو پەرلەمانتارەی پارتی لە پەرلەمانی عێراق ئاماژەی بەوەشکرد، تائێستا کاندیدی وەزارەتی دادی عێراقیش کە لەپشکی یەکێتی نیشتیمانی کوردستانە یەکلایی نەکراوەتەوە.

 

ئەمە لە کاتێکدایە کە دوێنێ بەدر زەیادی، پەرلەمانتاری هاوپەیمانی سائیرونی سەر بە موقتەدا سەدر لە لێداونێکی ڕۆژنامەوانێدا بۆ ئاژانسی هەواڵی فەرمی عێراقی ڕاگەیاند، "کارنامەی دانیشتنی ڕۆژی چوارشەممەی داهاتووی پەرلەمانی عێراق بووەتە جێگای مشتومڕی لایەنە سیاسیەکان و تائێستاش لەسەری ڕێکنەکەوتوون".

 

زەیادی باسی لەوشکردبوو کە "ناوى بەربژێرەکان بۆ پڕکردنەوەی ئەو حەوت وەزارەتە ئەمڕۆ سێشەممە دەگاتە دەستی سەرۆکایەتی پەرلەمانی عێراق".

 

ڕوونیشکردەوە، "دانیشتنەکەی ڕۆژی چوارشەممەی پەرلەمانی عێراق گفتۆگۆ لەسەر چەند بابەتێکی دیکەش دەکات وەک یاسای موچەی ڕەفحا و یاسای بودجەی گشتی عێراق و چەند یاسایەکی تریش".   

 

پەرلەمانی عێراق لەسەرەتای مانگی ئایاری ڕابردوودا متمانەی بە 15 وەزیری کابینەکەی کازمی بەخشی، پێنح وەزارەتیش کە پێکهاتبوون لە وەزارەتەکانی "بازرگانی، ڕۆشنبیری،کشتوکاڵ، داد و کۆچ وکۆچبەران" کاندیدەکانی ڕەتکردووە و دوو وەزارەتیش کە پێکهاتبوون لەوەزارەتەکانی (دەرەوە و نەوت) بەبێ کاندید مانەوە ئەوەش بە هۆی ڕێکنەکەوتن لەسەر کاندیدەکانیان لەلایەن پێکهاتەکانی پڕۆسەی سیاسی عێراقەوە.