گه‌ڕان

Shadow Shadow
وه‌رزش

ڕێکخراوی تەندروستی جیهانی: کۆرۆنا هێز و توانای خۆى لە دەستنەداوە

2020.06.01 - 23:44
ڕێکخراوی تەندروستی جیهانی: کۆرۆنا هێز و توانای خۆى لە دەستنەداوە

ناس کورد-

ڕێکخراوی تەندروستی جیهانی ڕایگەیاند، تائێستا هیچ بەڵگەیەک نییە ئەو بسەلمێنێت کە ڤایرۆسی کۆرۆنا بەراورد بە ئێستا وسەرەتای سەرهەڵدانی هێزو توانای لە توشکردن و بڵاوبوونەوەی کەمبووەتەوە.

 

ماریا ڤان کێرخۆف، بەڕێوەبەری جێبەجێکاری بەرنامەی لەناکاوی ڕێکخراوی تەندروستی جیهانی لە دیمانەیەکیدا لەگەڵ میدیا جیهانییەکان ڕایگەیاند، "هیچ گۆڕانکارییەک بەسەرهێزو توانای ڤایرۆسی کۆرونادا نەهاتووە سەبارەت بە توانای بڵاوبوونەوەی و توشکردنی مرۆڤەکان".

 

 وتیشی، "ئەوە گرنگە کە لە ئێستادا ڕێکاری بەرگرتن و سنوردارکردنی پەتاکە هەیە".

 

لێداوانەکەی ئەوبەرپرسەی ڕێکخراوی تەندروستی جیهانی لەکاتێکدایە کە لە ڕۆژانی ڕابردوودا ئاماژەکان ئەوەیان دەرخست کە  ژمارەی توشبوون ومردن بە ڤایرۆسەکە بەتایبەتی لەو وڵاتانەی کە بە شێوەیەکی ترسناک گیرۆدەی ڤایرۆسەکەبوون کەمبووەتەوە، ئەوەش وایکرد هەندێک ڕێکخراو ولایەن لە جیهاندا پێشبینی ئەوە بکەن کە ڤایرۆسەکە توانای خۆی لە بڵاوبوونەوە لە دەستداوە.  

 

ڤایرۆسی کۆرۆنا لەلایەن ڕێکخراوی تەندروستی جیهانەوە بە پەتایەکى ترسناک و کوشندە پۆلێنکراوە، پەتاکە زیاتر لە شەش ملیۆن کەسی لە جیهاندا گیرۆدە کردووە و زیاتر لە 375 هەزار کەسیش بە هۆی توشبوونیان بە نەخۆشییەکەوە لەسەرتاسەری جیهاندا گیانیانلەدەستداوە.