گه‌ڕان

Shadow Shadow
وه‌رزش

داواکاری گشتیی سلێمانی: هەرکەس متمانەی هاووڵاتیان بەبوونی کۆرۆنا کەمبکاتەوە سزادەدرێت

2020.06.01 - 15:00
داواکاری گشتیی سلێمانی: هەرکەس متمانەی هاووڵاتیان بەبوونی کۆرۆنا کەمبکاتەوە سزادەدرێت

ناس کورد-

داواکاری گشتیی سلێمانی داوایەکی لە کەناڵەکانی ڕاگەیاندن و بەکارهێنەرانی سۆشیاڵ میدیا کرد لە مەترسییەکانی کۆرۆنا کەمنەکەوە و ئاماژەی بەوەشکرد، هەر لایەنێک هاووڵاتیان ساردبکاتەوە لە ڕێکارەکانی خۆپارێزی دژی ڤایرۆسەکە، ڕێکاری یاسایی بەرامبەر دەگرنەبەر.

 

ئەمرۆ دووشەممە لە ڕاگەیەندراوێكدا، داواکاری گشتیی سلێمانی ڕاگەیاند: "بەپێی ئەو داتا و زانیارییانەی بڵاودەکرێنەوە دەردەکەوێت بڵاوبوونەوەی ڤایرۆسی کۆرۆنا زۆر لە ڕابردوو خێراترە، بۆیە داوا لە هاووڵاتیان دەکەین لەپێناو پاراستنی تەندروستی خۆیان زیاتر پابەندی ڕێنماییە تەندروستییەکان بن".

 

داواکاری گشتیی سلێمانی داوای لە مامۆستایانی ئایینی، ڕۆشنبیران و دەزگاکانی ڕاگەیاندن کردووە ڕۆڵی ئەرێنی ببینن لە هۆشیارکردنەوەی هاووڵاتیان، هەروەک پێشتر ئەو ڕۆڵەیان بینیوە.

 

ئاماژەی بەوەشکردووە: " داوا لە دەزگاکانی ڕاگەیاندن و سۆشیاڵ میدیا دەکەین کە بەرپرسانە هەڵسوکەوت بکەن و لە مەترسی ڤایرۆسەکە کەم نەکەنەوە و نەبنە هۆکاری لاوازکردنی بڕوا و متمانەی هاووڵاتیان، بەپێچەوانەوە ناچاردەبین ڕێکاری یاسایی لە دژیان بگرینەبەر".

 

ئەمە لەکاتێکدایە، لەگەڵ بڵاوبوونەوەی ڤایرۆسی کۆرۆنا لە هەرێمی کوردستان و بەتایبەتیش هەڵکشانی ژمارەی توشبووان لە چەند ڕۆژی ڕابردوودا، بەشێك لە هاووڵاتیان و لایەنە سیاسییەکانیش گومانیان لێی هەیە و دەڵێن: "ئەو پرسە بەسیاسی کراوە و ژمارەکان ڕاست نین".