گه‌ڕان

Shadow Shadow
سیاسه‌تی

پارتی پیرۆزبایی لە یەکێتی کرد و داوای ’’یەکڕیزی’’ لێ دەکات

2020.05.31 - 13:36
پارتی پیرۆزبایی لە یەکێتی کرد و داوای ’’یەکڕیزی’’ لێ دەکات

ناس کورد-

دوای ماوەیەک لە قوڵبوونەوەى کێشە و ململانێکان و کۆنەبوونەوە، مەکتەبی سیاسی پارتی پیرۆزبایی ئاڕاستەی مەکتەبی سیاسیی یەکێتی کرد بەبۆنەى 45مین ساڵیادی دامەزراندنی ئەو حزبەوە و داوای یەکڕیزی لێ دەکات.

 

ئەمڕۆ یەکشەممە، 31ی ئایاری 2020، لە پەیامێکدا مەکتەبی سیاسی پارتی دەڵێت، "لەکاتێکدا ئەو یادە دەکەینەوە کە وڵاتەکەمان لە ھەلومەرجێکی ناھەموار و ناوچەکە لە بەردەم گۆڕانکاری خێرادایە کە ئەمەش وا دەخوازێ سەرجەم هێز و لایەنە سیاسییەكانی كوردستان بەوپەڕی بەرپرسیاریەتیەوە ئەركە نەتەوەیی و نیشتیمانیەكانیان راپەڕێنن و لەپێناوی بەرژەوەندییە باڵاكانی گەل و وڵاتەكەمان درێغی نەكەن."

 

داواش دەکات "هەوڵی جدی بدرێ بۆ زیاتر پتەوكردنی یەكڕیزیی و یەكدەنگیی هێز و لایەنە سیاسیەكان و پاراستنی دەستکەوتەکان و بەھێزترکردنی ئەزموون و دۆزی رەوای گەلەکەمان و، بەدیهێنانی ئامانجەكانمان و دابینکردنی ئارامی و خۆشگوزەرانی بۆ ھاوڵاتیان."

 

 

دەقی تەواوی پەیامەکەی مەكتەبی سیاسی پارتی دیموكراتی كوردستان:

 

پەیامێکی پیرۆزبایی ئاراستەی یەکێتی نیشتمانی کوردستان دەکات..

بۆ بەڕێز مەکتەبی سیاسی یەکێتی نیشتمانی کوردستان

بەبۆنەی چل و پێنجەمین ساڵیادی دامەزراندنی یەکێتی نیشتمانی کوردستان پیرۆزبایی ئاراستەی ئێوەی بەڕێز و سەرکردایەتی و ئەنجوومەنی باڵای سیاسی و بەرژەوەندیەکانی یەکێتی و سەرجەم کادیر و ئەندام و لایەنگرانی حزبە تێکۆشەرەکەتان دەكەین و، ھیوای سەرکەوتنتان بۆ دەخوازین.

لەکاتێکدا ئەو یادە دەکەینەوە کە وڵاتەکەمان لە ھەلومەرجێکی ناھەموار و ناوچەکە لە بەردەم گۆڕانکاری خێرادایە، کە ئەمەش وا دەخوازێ سەرجەم هێز و لایەنە سیاسییەكانی كوردستان بەوپەڕی بەرپرسیاریەتیەوە ئەركە نەتەوەیی و نیشتیمانیەكانیان راپەڕێنن و لەپێناوی بەرژەوەندییە باڵاكانی گەل و وڵاتەكەمان درێغی نەكەن و، هەوڵی جیددی بدرێ بۆ زیاتر پتەوكردنی یەكڕیزیی و یەكدەنگیی هێز و لایەنە سیاسیەكان و پاراستنی دەستکەوتەکان و بەھێزترکردنی ئەزموون و دۆزی رەوای گەلەکەمان و، بەدیهێنانی ئامانجەكانمان و دابینکردنی ئارامی و خۆشگوزەرانی بۆ ھاوڵاتیان.

جارێكی دیكە پیرۆزباییتان لێدەكەین و هیوادارین سەركەوتوو و سەرفراز بن..

مەكتەبی سیاسی
پارتی دیموكراتی كوردستان