گه‌ڕان

Shadow Shadow
سیاسه‌تی

ماڵە بەسەر حکومەتەوە

وەزیرێکى پارتى باسى دۆسیەى قەرزەکان و نێچیرڤان بارزانى دەکات

2020.05.29 - 17:11
وەزیرێکى پارتى باسى دۆسیەى قەرزەکان و نێچیرڤان بارزانى دەکات

ناس کورد-

 

وەزیرێکى پارتى لە حکومەتى هەرێم باسى دۆسیەى قەرزەکانى سەر حکومەت و کاردانەوەکان دەکات و دەڵێت ئەو قەرزە بەسەر حکومەتەوە ماڵەو دەبێت بیداتەوە.

 

ئالان حەمە سەعید وەزیرى پەروەردە کە لە پشکى پارتى پۆستەکەى وەرگرتووە لە وتارێکدا لە هەژمارى فەرمى خۆى لە فەیسبوک نوسیویەتى "کابینەی نۆیەم میلادێکی نوێ نەبوو لە حوکمڕانی کوردستان، بەڵام میلادێکی نوێ بوو لەوەی چیدیکە کێشەکان نابێ دوابخرێن بەڵکو دەبێ چارەسەربکرێن".

 

ئاماژەى بەوەشکردووە،  بەشێک لە سیاسیيەکان لە بنەڕەتیشدا خۆیان بەزەرەرمەندی یەکەم دەزانن کاتێک حوکمڕانی شەفاف بێت و دادپەروەر بێت و دژی گەندەڵی و بەهەدەردان بێت. "لێرەوە ئیشکالیەتەکە سەرهەڵدەدات ئەو ژمارەیە لە سیاسيیەکان کە تووشی گرفت دەبن بە دەسەڵاتێکی شەفاف و دادپەروەر خۆیان دەکەن بە فریادڕەسی هاووڵاتیان کە لە بنەڕەتدا ئەوە هاووڵاتیيە راستگۆیە و حوکمڕانیيەکی دەوێت دادپەروەربێت".

 

ئالان حەمەسەعید باسى لە کاردانەوەکانى وتارەکەى سەرۆکى حکومەت کردووە کە لەبارەى قەرزەکانەوە پێشکەشیکرد و ڕایگەیاند کە حکومەت 27 ملیار دۆلار قەرزارە، لەو بارەیەوە نوسیویەتى "ئەم راشکاویەی سەرۆکوەزیران رەنگە خوێندنەوەی واقيعی بۆنەکرابێت ، ئەزموونی 28 ساڵی دامەزراوەکانی ئێمە لە حوکمڕانی گرفت کەسەکان نەبووە، بەڵکو ژینگەیەکی سیاسی ناتەندروست بووە".

 

"پارتە سیاسيیەکانی کوردستان لە دەسەڵات بوبێتن یان لە ئۆپۆزيسیۆن، هەمیشە گوشاریان لە حکومەت کردووە و حکومەتیان خستووەتە جوغزێکی تەسکەوە بۆ ئەوەی داواکاریيەکانیان جێبەجێبکات، ئەمە بەرهەمی کارلێککردنی هاوکێشە سیاسیيەکان بووە لە کوردستان، بەڵام ئەم زەمان و مەکانە وادەخوازێت چارەسەربکرێن".

 

هەروەها نوسیویەتى "تۆ لە دراوسێیەکت پارە وەربگریت، یان بچی پارەی نەختیینەی بانکە ناحکومیيەکان رابکێشیت یان پارەی کۆمپانیای نەوتت لەسەر ماڵ بێت و نەتدابێت یان بەڵێندەر پرۆژەی بۆ دروستکردبيت و پارەی خۆی وەرنەگرتبێت یان مووچەی فەرمانبەرانت پاشەکەوت کردبێت، بەتەواوی هەموو ئەمانە دەزانین هۆکارەکەی نە ناردنی بودجەی کوردستان بووە لەلایەن حکومەتی فیدرالەوە، ئیدی ئەم فەلسەفە بەخشینەوەی بۆچيیە؟ کەواتە تۆ قەرز بێت یان ئیلتیزام یان هەر ناوێکی دیکەت حەز لێیە  لێیبنێ کەی ئەوە گرفتە؟ کەواتە تۆ پارەیەکت لەسەرە وەک حکومەت، کەی؟ چۆن؟ بەچی؟ ئەوانە وردەکارین، بەڵام وێنەکە روونە کە تۆ پارەیەکت بەسەرەوە ماڵە، حکومەتیش بەشەفافی هەموو ئەو داتایانە بۆ پەرلەمان و رای گشتیش دەخاتەڕوو".

 

وەزیرى پەروەردە جەختیکردووەتەوە، ئەمە میلادێکی نوێ نییە لە حوکمڕانی، بەڵکو ئەو ستایلەیە لەحوکمڕانی کە وتنی هەموو راستی و واقعەکانە بە هاووڵاتیان، رەنگە هەندێک جاریش بوترێت کە خەڵکی ئێمە لەگەڵ ئەم شێوازە، ئەوپەڕی سەراحەت، رانەهاتوون، بەڵام ئەمە دەرگا کردنەوە بوو بۆ ئایندەش کە نابێ لەمەودوا هیچ لە خەڵک شاراوەبێت.

 

دەشڵێت "هەندێک دەیانەوێ بڵێن ئەم حکومەتە قەرزار نيیە و بە ئەنقەست مووچەی خەڵک نادات، ئەگەر وایە کوا ئەو پارەیە لە کوێ یە؟ بفەرموون بەکردەوە دەستی بخەنە سەر با هەموومان حکومەت ناچار بکەین بیدات".

 

"ئیدی ناتوانرێت دۆخی باو بەردەوام بێت، وەک ئاگاداریشم نێچیرڤان بارزانی، سەرۆکی هەرێمی کوردستان وەک چۆن لەسەرەتای کابینەی نۆیەمەوە پاڵپشتیکاری هەنگاوەکانی حکومەت بووە، بۆ ئەنجامدانی چاکسازیش بەرگریکار و پشتیوانی حکومەتە. کوردستانیش رێگەی دیکەی لەبەردەم نيیە جگە لە چاکسازی گشتی لە کۆی سێکتەرەکانی حکومی و بەدیهێنانی دادپەروەری"، وەزیرى پەروەردە واینوسیوە.