گه‌ڕان

Shadow Shadow
سیاسه‌تی

لیژنەى دارایى زانیارى نوێ لەبارەى پاشەکەوتى موچە ئاشکرا دەکەن 

2020.05.27 - 23:52
لیژنەى دارایى زانیارى نوێ لەبارەى پاشەکەوتى موچە ئاشکرا دەکەن 

ناس کورد-

ئەندامێکی لیژنەی دارایی پەرلەمانی عێراق، ڕەتیکردەوە ڕێگەبە بڕین و پاشەکەوتی موچەی فەرمانبەران بدەن، دەشڵێت، حاڵ نەگەیشتوەتە ئەوەی ئەو پژاردەیە پەیڕەو بکەین، هەرکاتیش بڕیار لەسەر بڕینی موچە درا ئەوا ئەو بژاردەیە تەنها موچەی پلە باڵاکان دەگرێتەوە.

 

ئەحمەد جبوری، ئەندامی لیژنەی دارایی پەرلەمانی عێراق، لە لێدوانێکی ڕۆژنامەوانیدا ڕایگەیاند : "قەیرانی دارایی واقعێکی حاشاهەڵنەگرە لە عێراق، ناتوانین نکۆڵی لێبکەین، دەبێت هەموومان یەک هەڵوێست بین لەپێناو دەربازبوون لەم قەیرانە".

 

 دەشڵێت : "لیژنەی دارایی پەرلەمانی عێراق ڕێککەوتووە لەسەر کەمکردنەوەی موچەی پلە باڵاکان، بەڕێوەبەری گشتی بەرەو سەرەوە، بەڵام فەرمانبەرە پلە ئاساییەکان دڵنیا دەکەینەوە ئێمە دەبین بە پارێزەری مافەکانیان و ڕێگەنادەین دەست بۆ موچەکانیان ببەن".  

 

جبوری، جەختیشیکردەوە : "پاش ئەوەی توانرا موچەی مانگی نیسان و ئایار بدرێت لە ئێستادا حکومەت ئامادەکاری دەکات بۆ پێدانی موچەی مانگی حوزەیران، ئەوەش لە ڕێگەی داهاتەکانی باج، گومرک و قەرزی ناوخۆیی و دەرەکی".

 

ئەندامەکەی لیژنەی دارایی پەرلەمانی عێراق ئاماژەی بەوەشکرد : "موچەی مانگی شەش بەبێ هیچ بڕینێک دەدرێت بە فەرمانبەران، ئەو دەنگۆیانەشی کەباس لە بڕین و پاشەکەوتی زۆرەملێی دەکەن دوورن لە ڕاستیەوە وهیچ بنەمایەکی نییە".

 

 جبوری، دووپاتیشیکردەوە "لە ئێستادا کاردەکەن بۆ دوورکەوتنەوە لە بژاردەی بڕین لە موچەی فەرمانبەران، چونکە قەیرانەکە ئەوەندە قوڵنەبوەتەوە کە ناچاربین ئەو ڕێگایە بگرینە بەر".

 

 لێدوانەکەى جبوری لە کاتێکدایە کە چەند ڕۆژێکە لە تۆڕە کۆمەڵایەتییەکان دەنگۆی ئەوە بڵاوبووەتەوە  کە گوایە حکومەتی عێراق بە هۆی دابەزینی نرخی نەوت و قەیرانی پەتای کۆرۆنا و مەبەستی ڕزگاربوون لەو ئاستەنگییە داراییەی کە لەئێستادا دوچاری بووەتەوە نیازی بڕینی بەشێک لە موچەی فەرمانبەرانی هەیە.