گه‌ڕان

Shadow Shadow
سیاسه‌تی

 دوناڵد ترەمپ و جۆ بایدن لەسەر بەستنى دەمامک گاڵتە بەیەکتر دەکەن

2020.05.27 - 23:02
 دوناڵد ترەمپ و جۆ بایدن لەسەر بەستنى دەمامک گاڵتە بەیەکتر دەکەن

ناس کورد-

 لەئێستادا ڕکابەرێتی نێوان دوناڵد ترەمپ، سەرۆکی ئەمریکا و جۆ بایدن، بەربژێری دیموکراتەکان بۆ پۆستی سەرۆکی ئەمریکا، شۆڕبووەتەوە بۆ تەنز و گاڵتە بەیەککردن لە تۆڕە کۆمەڵایەتییەکان لەسەر بەستنى دەمامک.

وەک گاڵتەجاڕییەک بە جۆ بایدن کاتێک بەشداری لە مەراسیمی ڕۆژی (یادەوەرییەکان)ى کرد، ترەمپ دووبارە تویتێکی پێشووی خۆی بڵاوکردەوە کە تیێدا گاڵتەی بە بایدن کردووە  و دەڵێت "زۆر سەیرە بایدن لە ڕێوڕەسمی یادەوەرییەکاندا کە هەرچەندە لە شوێنێکی کراوەدا ئەنجامدراوە، دەمامکی بەستووە".  

 

هەر دوای تەنزەکەی ترەمپ، جۆ بایدن لە چاوپێکەوتنێکی کەناڵی "سی,ئێن .ئێن"ی ئەمریکیدا وەڵامی ترەمپی دایەوە بە "گەوجێکی تەواو"ى وەسفکرد.

 

 بایدن وتیشی  "ترەمپ نەدارە لە هونەری سەرکردایەتیدا، لە چەندین ڕێوڕەسمدا دەرکەوتووە دەمامکی نەبەستووە ئەوەش وادەکات ژیانی کەسانی تر بخاتە مەترسییەوە".  

 جۆبایدن لە چاوپێکەوتنەکەدا وتیشی "بەڕاستی ترەمپ گێلە کاتێک بەو شێوەیە قسە دەکات، هەموو پزیشکێکی گەورەی ئەم جیهانە جەخت لەوە دەکەنەوە کە بەکارهێنانی دەمامک لەنێو ئاپۆڕای خەڵکدا زۆر گرنگە".

 

جۆ بایدن، بەربژێری دیموکراتەکان بۆ پۆستی سەرۆکی ئەمریکا، دوای دوو مانگ مانەوەی لەماڵەوە بەهۆی خۆپارێزی لە پەتای کۆرۆنا ڕۆژی (دووشەممە)ی ڕابردوو بۆ یەکەمجار لەگەڵ هاوسەرەکەی دەرکەوت و هەردووکیان بە بەدانانی تاجە گوڵینە لەسەر مۆنۆمێنتی "سەربازی ون" لە ڕێوڕەسمێکی  ڕۆژی "یادەوەری"  بەشدارییانکرد .