گه‌ڕان

Shadow Shadow
سیاسه‌تی

ئەندامێکی سەرکردایەتی پارتی ئاشکرای دەکات

پارتى وادەى کۆبوونەوەى لەگەڵ یەکێتى ئاشکرا دەکات.. ’’لەزۆر شتدا جیاوازین’’

2020.05.27 - 14:35
پارتى وادەى کۆبوونەوەى لەگەڵ یەکێتى ئاشکرا دەکات.. ’’لەزۆر شتدا جیاوازین’’

ناس کورد-

ئەندامێكی سەركردایەتیی پارتی دیموكراتی كوردستان ڕایگەیاند، بڕیارە هەفتەی داهاتوو لەگەڵ یەكێتی نیشتیمانی كوردستان كۆببنەوە بۆ ئەوەی دۆخی نێوانیان ئاسایی بێتەوە.

 

ئاراس حەسۆ میرخان بە ماڵپەڕی فەرمیی حزبەکەى ڕاگەیاندووە، "دوای دەستپێكردنەوەی دەوام، ڕۆژی یەكشەممەی داهاتوو پارتی و یەكێتی بە ‌هەماهەنگی بۆ هەفتەی داهاتوو ڕۆژێك دیاری دەكەن بۆ ئەوەی پێكەوە كۆببنەوە، ئەمەش بۆ ئاساییكردنەوەی دۆخی نێوانیانە".

 

وتیشی، "ئەنجامدانی ئەو كۆبوونەوەیە گرنگیی زۆری هەیە، بۆ ئەوەی پێكەوە باسی گلەییەكانی خۆمان بكەین و چارەسەر بۆ كێشەكان بدۆزینەوە، بۆیە پێویستە كۆبوونەوە بكرێت و مەرجیش نییە هەموو كێشەكان بە یەك جار چارەسەر بكرێن، لەبەر ئەوەی بۆچوونی جیاوازمان لە زۆر شتدا هەیە".

 

ئاراس میرخان جەختیکردەوە، پێویستە شەڕی ڕاگەیاندن ڕابگیرێت، "ناكرێت بۆچوونی حیزبی خۆمان بخەینە ناو حكومەت، بۆیە ئەگەر هیچ نەیەتە پێشەوە، هەفتەی داهاتوو یەكێتی و پارتی پێكەوە كۆدەبنەوە".

 

پەیوەندییەکانى یەکێتى ماوەى چەند مانگێکە روویان لە گرژبوون و ئاڵۆزى کردووە، بەهۆى کێشەکانیان لەسەر پرسى شەراکەت لە حکومەت و ئاڵۆزییەکانى زینى وەرتێ و کۆوبونەوەکەى سەرەتاى ئەم مانگەى پەرلەمانەوە، بەو هۆیەشەوە چەند جارێک وادەى کۆبوونەوەى نێوانیان هەڵوەشاوەتەوە.

 

ڕێبوار ئیسماعیل، بەرپرسى مەڵبەندى سێى یەکێتى لە هەولێر لە کۆنفرانسێکى ڕۆژنامەنوسى هاوبەشدا لەگەڵ فرسەت سۆفى، پارێزگارى هەولێر ڕایگەیاند، بڕیارە کۆبوونەوەى نێوان پارتى و یەکێتى بکرێت بەڵام کات و شوێنەکەى دیارینەکراوە.  

 

لەدواى کۆنگرەى یەکێتى یەوە لەکۆتایی ساڵى ڕابردوودا کە تێیدا هاوسەرۆکان و سەرکردایەتى نوێ بۆ یەکێتى هەڵبژێردرا، هیچ کۆبوونەوەیەک لەنێوان پارتى و یەکێتیدا ئەنجامنەدراوە.