گه‌ڕان

Shadow Shadow
سیاسه‌تی

’’دەبێت ئێمەش بەشدار بین’’

یەکێتى داواى هەڵدانەوەى ’’لاپەڕەیەکى نوێ’’ دەکات بۆ بەڕێوەبردنى هەولێر و حوکمڕانی

2020.05.27 - 11:53
یەکێتى داواى هەڵدانەوەى ’’لاپەڕەیەکى نوێ’’ دەکات بۆ بەڕێوەبردنى هەولێر و حوکمڕانی

ناس کورد-

یەکێتى نیشتیمانى کوردستان داواى هەڵدانەوەى لاپەڕەیەکى تازە دەکات بۆ حوکمڕانى و ئیدارەدانى هەولێر، پارێزگارى شارەکەش داواى پشتیوانى لەو حزبە دەکات بۆ کارەکانیان.

 

ئەو داوایانەى یەکێتى و پارێزگارى هەولێر لەیەکترى، لە کۆبوونەوەیەکدا تاوتوێ کرا کە ئەمڕۆ لەنێوان فرست سۆفى، پارێزگارى هەولێر و مەڵبەندى سێى یەکێتى لە هەولێر بەڕێوەچوو.

 

ڕێبوار ئیسماعیل، بەرپرسى مەڵبەندى سێى یەکێتى لە هەولێر لە کۆنفرانسێکى ڕۆژنامەنوسى هاوبەشدا لەگەڵ فرسەت سۆفى، پارێزگارى هەولێر ڕایگەیاند، "ئێمە لیستى دووەمین لە ئەنجومەنى پارێزگاى هەولێر، بەڵام لە حکومڕانى ئەم شارە بەشدار نین، بەهۆى کۆمەڵێک هۆکار کە باسمان لەوەکرد وەلای بنێین و سیستەمێکى تازە لە حوکمڕانى هەولێر بێتە کایەوە".

 

وتیشى، "ئومێد دەکەین لاپەڕەیەکى تازە لە حوکمڕانى و ئیدارەدانى شارى هەولێر بکرێتەوە، ڕەنگە ئەمەش پەیوەست بێت بەکۆمەڵێک پرسی تر کە ئومێد دەکەین لە داهاتوودا قسەیان لەسەر بکرێت".

 

کۆبوونەوەکەى نێوان پارێزگارى هەولێر و مەڵبەندى یەکێتى لە هەولێر، ئەگەرچى لە چوارچێوەى کۆبوونەوەکانى ئیدارەى پارێزگاکەیە لەگەڵ لایەنە سیاسییەکان، بەڵام بە یەکەم کۆبوونەوەى لەو شێوەیە دادەنرێت لەماوەى چەندین مانگدا کە لەنێوان بەرپرسانى ئیدارى و حزبى پارتى و یەکێتیدا بەڕێوەبچێت.

 

کۆوبونەوەکە هاوکاتە لەگەڵ گرژییەکانى پارتى و یەکێتى، کە ڕێگرە لە کۆبوونەوەى نێوانیان، مانگى ڕابردوو چەند جارێک کۆبوونەوەى نێوانیان هەڵوەشایەوە و هێشتا دیار نییە کەى کۆدەبنەوە.

 

لەبارەى کۆوبونەوەى مەکتەبی سیاسی پارتى و یەکێتییەوە، بەرپرسى مەڵبەندى یەکێتى لە هەولێر ڕایگەیاند، بڕیارە کۆبوونەوەکە بکرێت بەڵام کات و شوێنەکەى دیارینەکراوە.

 

لاى خۆیەوە، فرسەت سۆفى ڕایگەیاند، دەیانەوێت هەماهەنگیان هەبێت لەگەڵ هەموو لایەنە سیاسییەکان و پشتیوانیان بن بەتایبەتى یەکێتى بۆ ئەوەى ئیدارەیەکى باشى پارێزگاکە بکەن.