گه‌ڕان

Shadow Shadow
سیاسه‌تی

کازمی و پوتین تاوتوێی ’’سەقامگیری بازاڕی نەوتیان’’ کرد

2020.05.25 - 17:34
کازمی و پوتین تاوتوێی ’’سەقامگیری بازاڕی نەوتیان’’ کرد

ناس کورد-

کۆشکی کرملنی ڕوسیا ڕایگەیاند، مستەفا کازمی، سەرۆکوەزیرانی عێراق و ڤلادیمێر پوتین، سەرۆکی ڕوسیا لە پەیوەندییەکی تەلەفۆنیدا تاوتوێی هەماهەنگییەکانیان کردووە بۆ "سەقامگیری بازاڕ و نرخی نەوت."

 

ئەمڕۆ دووشەممە، 25ی ئایاری 2020، کۆشکی کرملن ڕایگەیاند، لە پەیوەندییەکی تەلەفۆنیدا کازمی و پوتین باسیان لە کاریگەری ئەرێنی ڕێککەوتنی ئۆپێک پڵەسیان کردووە بۆ کەمکردنەوەى ئاستی بەرهەمهێنانی نەوت و جەختیان کردووەتەوە لەسەر بەردەوامی.

 

لە ڕاگەیەنراوی کۆشکی کرملندا هاتووە، "بە شێوەیەکی ئەرێنی هەڵسەنگاندن کرا بۆ ڕێککەوتنی ئۆپێک پڵەس بە بەشداری عێراق و ڕوسیا تاوەکو ئەم دۆخە سەختەی قەیرانی نرخی نەوت تێپەڕێنین، هانی کاری پێکەوەیی زیاتر درا لەو بوارەدا."

 

دەشڵێت، "گفتوگۆ لەبارەى چەند بابەتێکی تری هەرێمییەوە کراوە، بە تایبەت شەڕ و قەیرانی سوریا، هەردوولا ڕێککەوتن لەسەر هەماهەنگی و هەنگاوی زیاتر بۆ گەرەنتیکردنی سەقامگیری لە دۆخی سوریا و گەڕاندنەوەى سەروەری بۆی."

 

هاوکات سەرۆکى ڕوسیا، بەپێی ڕاگەیەنراوەکە، پیرۆزبایی جەژنی ڕەمەزانی لە سەرۆکوەزیرانی عێراق کردووە و بەڵێنی بەردەوامی کارکردنیان داوە.