گه‌ڕان

Shadow Shadow
سیاسه‌تی

تورکیا بە چڕی تۆپبارانی سیدەکان دەکات و ژمارەیەک شوانکاریش هەڵاتوون

2020.05.24 - 13:54
تورکیا بە چڕی تۆپبارانی سیدەکان دەکات و ژمارەیەک شوانکاریش هەڵاتوون

ناس کورد- ئاکۆ حەمەد رابی

 

لەگەڵ یەکەم ڕۆژی جەژنی ڕەمەزن و لە پاشنیوەڕۆی ئەمڕۆ یەکشەممە 24ی ئایار تۆپخانەکانی سوپای تورکیا بەچڕی تۆپبارانی سێ گوندی ناحیەی سیدەکانی قەزای سۆران دەکەن، شایەتحاڵێکیش لە ناوچە سنوریەکانەوە دەڵێت، بەهۆی مەترسی لەسەر گیانیان چوار شوانکار هەڵاتون و ناوچەکەیان جێهێشتوە.

 

وڵات برادۆستی شایەتحاڵ و نیشتەجێی گوندێکی نزیک لە سیدەکان بە ناس کوردی ڕاگەیاند: " تۆپخانەکانی سوپای تورکیا بەم یەکەم ڕۆژی جەژنە بەشێوەیەکی چڕو سەخت دەستیانکردوە بە تۆپبارانکردنی سێ گوندی ناوچەی سنوری ناحیەی سیدەکانی قەزای سۆران و تائێستاش بۆردومانەکە درێژەی هەیە".

 

باسی لەوەشکرد: " گوندەکانی خەلیفان، کەندەگەری و گوڕەشە بوونەتە ئامانجی تۆپبارانی سوپای تورکیا".

 

ئەو شایەتحاڵە ڕونیشیکردەوە: "بەهۆی نزیکی تۆپبارانەکەو دروستبونی مەترسی لەسەر ژیانیان چوار شوانکار هەڵاتوون و ناوچەکەیان جێهێشتوە".

 

بەپێی زانیاریەکانی ناس کورد ئەو بەرزایانەی کە سوپای تورکیای تێدایە لەسیدەکان، لەوێشەوە بەهاوەن تەقە لەگوندەکان دەکەن.

 

هاوکات جەلال عوزێر، موختاری گوندی ناوچە سنوریەکان بە ناس کوردی ڕاگەیاند: "بەهۆی بەردەوامی تۆپبارانەکە تائێستا زیانەکانی نازانین، بەڵام هاوڵاتیان و گوندنشینان لە دڵەڕاوکێدا دەژین".