گه‌ڕان

Shadow Shadow
سیاسه‌تی

شەپۆلێکی بارانبارین دەستپێدەکات و پلەکانی گەرما دادەبەزن

2020.05.24 - 11:17
شەپۆلێکی بارانبارین دەستپێدەکات و پلەکانی گەرما دادەبەزن

ناس کورد-

 

کەشناسێکی عێراقی پێشبینی دەکات پاش نیوەڕۆی ئەمڕۆ یەکشەممە گۆڕانکاری بەسەر کەشوهەوای هەموو ناوچەکانی عێراقدا بێت دەشڵێت، بەگوێرەی پێشبینییەکان، سبەینێ دووشەممە شەپۆلێکی بارانبارین هەرێمی کوردستان و چەند ناوچەیەکی عێراق دەگرێتەوە کە هاوکات دەبێت لەگەڵ دابەزینی  پلەکانی گەرمادا.

 

واسق سەلامی، کەشناسی عێراقی، بەپشت بەستن بە داتاو پێشبینییەکانی ناوەندی ئەمریکی بۆ پێشبینییەکانی کەشناسی لە هەژماری خۆی لە تۆڕی کۆمەڵایەتی فەیسبوک ڕایگەیاند: " پێشبینی دەکرێت سبەینێ دووشەممە  ناوچەکانی هەرێمی کوردستان، ناوەڕاستی عێراق و بەشێک لە ناوچەکانی باشوری عێراق دوچاری شەپۆلێکی بارانبارین و هەورە بروسکە ببنەوە".

 

سەلامی، ئاماژەی بەوەکردووە: "ئەو پاڵەپەستۆ نزمەی کە لە ئێستادا ڕووی لە عێراق کردووە پاشنیوەڕۆی ئەمڕۆ یەکشەممە پەیتا پەیتا قوڵتر دەبێتەوە، ئەوەش وادەکات لە زۆربەی ناوچەکانی عێراق خۆڵبارین ڕووبدات، پێشبینیش دەکرێت خۆڵبارینەکە  بەردەوامبێت تا سبەی شەو".



ئەو کەشناسە عێراقییە، پێشبینی ئەوەشی کردووە، پاش کۆتایی خۆڵبارینەکە، بەشێوەیەکی بەرچاو پلەکانی گەرما لە زۆربەی ناوچەکانی عێراق دابەزین بەخۆیانەوە ببینن. 

 

 سەلامی جەختیلەوەشکردووەتەوە، بەگوێرەی ئەو وێنانەی کە لە ڕێگەی مانگە دەستکردەکانەوە دەستی کەوتوون: " ئەوە دەردەخات کە بەشێکی زۆر لە کەڵەکە هەوری بەباران لە ئاسمانەکانی باشوری ڕۆژئاوای عێراقەوە  ڕوویان لە ئاسمانەکانی ناوچەکانی هەرێمی کوردستان و ناوەڕاستی عێراق کردوە، ئەوەش وادەکات شەپۆلێکی بارانبارین ڕوو لەو ناوچانە بکات".