گه‌ڕان

Shadow Shadow
سیاسه‌تی

ئێران و دوو مەرجەعى شيعى عێراقیش وەک سونەکان يەكشەممەيان كرد بە جەژن

2020.05.23 - 22:07
ئێران و دوو مەرجەعى شيعى عێراقیش وەک سونەکان يەكشەممەيان كرد بە جەژن

ناس کورد-

 

ئێڕان يەكشەممە دەكات بە جەژن و سيستانى دووشەممە و دوو مەرجەعى ئايينى شيعەش لە عێڕاق ڕۆژى يەك شەممەيان لەگەڵ وڵاتانى سونە كرد بە جەژن، ئەوەش شتێكى دەگمەنە، چونكە زۆرينەى ساڵەكان سەرجەم لايەن و وڵاتە شيعەكان ڕۆژێك دواى سونە دەيكەن بە جەژن.

 

لەوبارەيەوە نوسينگەى كەمال حەيدەرى يەكێك لە مەرجەعەكانى ئايينى شيعە لەبەياننامەيەكدا بڵاويكردوەتەوە، نوسينگەى ناوبراو ڕايدەگەيەنێت كە ڕۆژى يەكشەممە 24\5\2020 يەكەم ڕۆژى مانگى شەوال و يەكەم ڕۆژى جەژنى ڕەمەزانەى موبارەكە.

 

لەلايەكى ترەوە شێخ فازڵ بەدرى يەكێكى تر لە مەرجەعەكانى ئايينى شيعە بڵاويكردوەتەوە: "ڕۆژى يەكشەممە يەكەم ڕۆژى جەژنى ڕەمەزانى پيرۆزە و بەو بۆنەيەوە پيرۆزبايى لە موسوڵمانان دەكەين و لەخوا داواكارين كە ڕۆژو و تاعەتيان قبوڵ بكات و لە ئارەزوو و تاوان و نەخۆشى بيانپارێزێت، هەروەها وڵاتمان لە گەندەڵى و شەڕەنگێزى و بەڵا بپارێزێت".

 

ئەمساڵ سونەكانى جيهان ڕۆژێك پێش وڵاتە شيعيەكان كردنيان بە ڕەمەزان و ڕەمەزانى ئەمساڵيش لاى سونەكان 30 ڕۆژى تەواو بوو.

 

ئەمەش لەكاتێكدايە، كۆمارى ئيسلامى ئێران ڕۆژى يەكشەممەى كرد بە يەكەم ڕۆژى جەژنى ڕەمەزان، بەڵام عەلى سيستانى، مەرجەعى باڵاى ئايينى شيعەكانى عێڕاق ڕۆژى دوو شەممەى كرد بە يەكەم ڕۆژى جەژن.