گه‌ڕان

Shadow Shadow
سیاسه‌تی

’’با هیچ بەرپرسێکیش پێی وانەبێ دنیا شامی شەریفە’’

ئەمیری کۆمەڵی ئیسلامی سێ داواکاری ’’بۆ گۆڕانکاریکردن’’ ئاڕاستەى بەرپرسانی هەرێم دەکات

2020.05.23 - 18:51
ئەمیری کۆمەڵی ئیسلامی سێ داواکاری ’’بۆ گۆڕانکاریکردن’’ ئاڕاستەى بەرپرسانی هەرێم دەکات

ناس کورد-

به‌بۆنه‌ی هاتنه‌وه‌ی جه‌ژنی ڕه‌مه‌زان عه‌لی باپیر په‌یامێكی ئاڕاسته‌ی هاووڵاتیان و حکومەتی هەرێم و دەسەڵاتداران کرد و لەچەند خاڵێکدا داوای چەند کارێکی بەپەلە لە حوکمڕانیی هەرێم دەکات.

 

ئەمڕۆ شەممە، 23ی ئایاری 2020، عەلی باپیر، ئەمیری کۆمەڵی ئیسلامی بەبۆنەی هاتنه‌وه‌ی جه‌ژنی ڕه‌مه‌زانەوە پەیامێکی بڵاوکردەوە و ڕایگەیاند: "ئاشكرایه‌ ئێمه‌ له‌ هه‌رێم و عێڕاق و سه‌رجه‌م به‌شه‌كانی كوردستان و وڵاتانی دراوسێ و ده‌ورووبه‌ریشماندا، له‌ بارودۆخێكی سه‌خت و دژواردا ئه‌م جه‌ژنه‌ ده‌كه‌ین، چونكه‌ له‌گه‌ڵ گه‌لێك قه‌یران و كێشه‌ی جۆراو جۆردا ده‌سته‌و یه‌خه‌ین، كه‌ به‌شێكیان ده‌رهاویشته‌ی په‌تای (كۆرۆنا)ن و زۆربه‌شیان قووڵ و ڕیشه‌دارو له‌مێژینه‌ن".

 

ئەمیری کۆمەڵی ئیسلامی دەشڵێت: به‌و بۆنه‌یه‌شه‌وه دوای جه‌ژنه‌ پیرۆزه‌ لێكردن،‌ ڕوو ده‌كه‌مه‌ حوكمڕان و به‌رپرسانی هه‌رێم و سێ داواکاری ئاڕاستەى بەرپرسانی حکومەتى هەرێم دەکات:

 

یه‌كه‌م: پێویسته‌ هه‌رچی زووتره‌ هه‌نگاو بنێن و هیمه‌ت بخه‌نه‌گه‌ڕ بۆ گێڕانه‌وه‌ی شكۆ و ئیعتیبار بۆ دامه‌زراوه‌كانی هه‌رێم، به‌جۆرێك كه‌ خه‌ڵك و جه‌ماوه‌ر متمانه‌ی پێیان هه‌بێ و به‌هی خۆییان بزانێ، نه‌ك به‌هی حیزب و شه‌خس و گرووپ كه‌ بێگومان دامه‌زراوه‌و داموده‌زگاكانی هه‌رێمه‌كه‌مان نیشانه‌ی پرسیاری زۆریان كه‌وتۆته‌ سه‌رو له‌كه‌دار كراون.

 

دووه‌م: چی دیكه‌ له‌كه‌وڵ و قاوغی ته‌سكی حیزبیی و شه‌خسیی و به‌رژه‌وه‌ندییه‌ بچووك و تایبه‌تییه‌كاندا خۆتان قه‌تیس مه‌كه‌ن و وه‌رنه‌ نێو بازنه‌ی فراوانی ده‌وڵه‌تداریی و خزمه‌تی كۆمه‌ڵگا به‌گشتیی، دڵنیابن ئامڕازی حوكمڕانیی سینگ فراوانییه‌ (آلة الرئاسة سعة الصدر) بۆیه هه‌رگیز‌ به‌بێ عه‌قڵی گه‌وره‌و دڵی فراوان، حوكمڕانییه‌كی سه‌ركه‌وتوو ناكرێ.

 

سێیه‌م: ئه‌گه‌ر ده‌تانه‌وێ ڕه‌خنه‌ی هه‌قتان لـێ نه‌گیرێ "ئه‌گه‌رنا هیچكه‌س له‌ڕه‌خنه‌و گله‌یی ناهه‌ق سه‌لامه‌ت نابێ" پێویسته‌ عه‌یب و کەم و کوڕییەکانتان چارەسەر بکەن، وەک گوتراوە: (الباب الذي یجیئك منه الریح سدّه، تستريح) ئەگەرنا بێگومان خەڵک هەتا عەقڵ و ویژدانیان زیندووبن، لە بەرانبەر ستەم و قۆرخکاریی و گەندەڵی و قڕیی و پڕیی و چینایەتییدا کە لەم ڕۆژگارە لە هەرێمدا یەکجار زەقە، بێدەنگ نابن.

 

لە درێژەی پەیامەکەیدا عەلی باپیر ئاماژەی بەوەکردووە: "با هیچ بەرپرسێکیش پێی وانەبێ، چونکە خۆی و دەوروبەری تێروپڕن و بارودۆخەکەیان بە کەیفێیە، دنیا شامی شەریفە، تکای دڵسۆزانەتان لێدەکەم لە بورجە عاجییەکانتان وەرنە خوارێ و بچنە نێو خەڵک و جەماوەر، تاکو بە چاوی سەرتان حاڵ و باڵی شپرزو مەینەتباریی زۆرکەس ببینن، نەک دەوروبەری سوود وه‌رگر، بە ڕاپۆرت و زانیاریی ناڕاست، چەواشەتان بکەن و ڕەشتان بە سپی پێشان بدەن، دڵنیاشبن ئه‌م بارودۆخه‌ به‌م شێوه‌یه‌ به‌رده‌وام نابێ".

 

لە کۆتایی پەیامەکەیدا ئەمیری کۆمەڵی ئیسلامی باسی لەوەکردووە: "لە کۆتاییدا دەڵێم جەژن دەرفەتێکە بۆ ئاشتەوایی و تەبایی و نەهێشتنی تەمومژی نێوانمان، بۆیە با حوکمڕان و دەسەڵاتدارانی هەرێم ئەو دەرفەتە بقۆزنەوە بۆ ئاشتەوایی لەگەڵ جەماوەری پەست و بێزاردا و، خەمێکی جدی لە ژیان و گوزەرانی خەڵک بە گشتیی و بەتایبەت چینی هەژارو نەدار بخۆن و گوێیان سووک بێ بۆ بیستنی دەنگی ئاخ و ناڵەو ناسۆریان و به‌ره‌و بێ ئومێدیی و بێزاریی زیاتریان نه‌به‌ن، چونكه‌ بێگومان هه‌موومان زیانی گه‌وره‌ی لێده‌كه‌ین".