گه‌ڕان

Shadow Shadow
سیاسه‌تی

بەغداش 30 ڕۆژ مۆڵەتی داناوە بۆی

بەڵگە.. هەرێم بە هەموو مەرجەکانی بەغدا ڕازی بووە تاوەکو ڕێکبکەون

2020.05.23 - 17:32
بەڵگە.. هەرێم بە هەموو مەرجەکانی بەغدا ڕازی بووە تاوەکو ڕێکبکەون

ناس کورد-

بەگوێرەی نوسراوێکی وەزیری دارایی عێراق، بەغدا بە مەرج ڕەزامەندبوون بە ناردنی 400 ملیار دیناری موچەی مانگی نیسان، هاوکات 30 ڕۆژیان داناوە بۆ گەیشتن بەڕێککەوتنی کۆتایی لەگەڵ چەند مەرجێکی دیکە، حکومەتی هەرێمیش بە سەرجەمیان ڕەزامەند بووە.

 

بەرواری 19ی ئایاری 2020، عەلی عەبدولئەمیر، وەزیری دارایی عێراق نوسراوێکی فەرمی ئاراستەی مەسرور بارزانی، سەرۆکی حکومەتی هەرێمی کورستان کرد.

 

لە نوسراوەکەدا ئاماژە بەوەکراوە، وەزارەتی دارایی عێراق بڕی 400 ملیاری دینار بۆ مانگی نیسان ڕەوانەی هەرێمی کوردستان دەکات.

me_ga.php?id=145

وەزیری دارایی عێراق ئاماژەی بە چەند مەرجێک کردووە بۆ ئەو مەبەستە و لە نوسراوەکەیدا هاتووە: "لە بەرامبەردا نوێنەرانی بەغدا و هەولێر دەست بە گفتوگۆ دەکەن بۆ گەیشتن بە ڕێککەوتنی کۆتایی لەماوەی 30 ڕۆژدا لەدوای ناردنی 400 ملیار دینارەکە و یاسا کارگێڕی و داراییە فیدڕاڵییەکانیش دەبنە بنەمای سەرەکی ڕێککەوتنەکە".

 

لە نوسراوەکەی وەزیری دارایی عێراق کە ئاڕاستەی سەرۆکی حکومەتی هەرێم کراوە ئەوەش هاتووە: "دیوانی چاودێری دارایی فیدڕاڵی بە هەماهەنگی دیوانی چاودێری دارایی هەرێم وردبینی دەکەن بۆ سەرجەم داهاتە نانەوتییەکانی هەرێمی کوردستان".

 

لە خاڵی کۆتایی نوسراوەکەی وەزیری دارایی عێراقدا ئاماژە بەوەکراوە: "دابينكردنى پارە بۆ بڕەكانى دواتر لە مانگى نيساندا دواى ئەو ڕێكکەوتنانە دەبێت لەو كۆبونەوانەى كە لە بڕگەى 2 دا باسكراون".

 

لەدوای نوسراوەکەی وەزیری دارایی عێراق، هەر هەمان ڕۆژ، وەزارەتی دارایی و ئابوری هەرێم وەڵامی نوسراوەکەی داوەتەوە و ڕایگەیاندووە: "حکومەتی هەرێمی کوردستان ڕەزامەندە بە ناوەڕۆکی نوسراوی ژمارە 802ی وەزارەتی دارایی عێراق کە لە 19ی ئایاری 2020، ئاڕاستەیان کردووە".

 

 

ئەمە لەکاتێکدایە، ماوەی نزیکەی دوو مانگە هەرێم و بەغدا گفتوگۆ دەکەن لەسەر کێشە هەڵپەسێردراوەکانی نێوانیان لەبارەی بودجە و نەوتەوە، بەڵام تائێستا نەگەیشتوونەتە هیچ ڕێککەوتنێک، بەڵام بەگوێرەی ئەم دوو نوسراوەی وەزارەتەکانی دارایی هەردوولابێت، پێدەچێت لە مانگی داهاتوودا ڕێککەوتنی نێوانیان بێتەدی. 

me_ga.php?id=146