گه‌ڕان

Shadow Shadow
سیاسه‌تی

وەزیرى دارایی عێراق وردەکاریی کەمکردنەوەى موچەى ئاشکراکرد

2020.05.23 - 09:34
وەزیرى دارایی عێراق وردەکاریی کەمکردنەوەى موچەى ئاشکراکرد

ناس کورد-

 

وەزیرى دارایی عێراق وردەکاریی کەمکردنەوەى موچەى چەند چینێکى فەرمانبەرانى ئاشکرا کرد کە بەشێوازى کەمکردنەوە یاخود پاشەکەوت دەبێت.

 

عەلى عەبدولئەمیر عەلاوى لەلێدوانێکیدا بۆ میدیاکانى وڵاتەکەى ئاماژەى بەوەکردووە، کەمکردنەوەى موچە، پلە باڵاکان دەگرێتەوە، کە نیوەى بودجە بۆ موچەکانیان دەڕوات.

 

ڕاشیگەیاندووە، کەمکردنەوەى موچەى فەرمانبەران و خانەنشینان ئەوانەى پلە نزمن و موچەکەیان 500 هەزاردینارە ناگرێتەوە.

 

عەلاوى دەڵێت، ئەوانەى بەهەدەردان تێیاندا هەیە لەدابینکردنى دەرماڵەى پلە باڵاکان کەمکردنەوەکە دەیانگرێتەوە و چینێکى نزیک لەپلەى پێنجەمى وەزیفى هەوڵدەدرێت زیانیان بەرنەکەویت بەڕادەى کەمتر یاخود پاشەکەوتیان بۆ دەکرێت ئەوەش دەخرێتە سەر بیمەى تەندروستى و نیشتەجێکردن .

 

وەزیرى دارایى باسى لەوەشکردووە، داڕشتنى بودجەکە بەشێوەیەکى هەڵە بووە و بەرچاوڕۆشنى بۆ واقیعى ئایندەى ئابورى تێدا نەبووە بریتیە لەکۆمەڵێک ژمارە و ساڵانە زیاترى خراوەتە سەر و کێشەى گەورەى بودجەکەش بەهۆى موچە و دەرماڵە و خەرجیەکانى دەوڵەتەوەیە کە ڕەچاوى شوێنکەوتە داراییەکانى تێدا نەکراوە، وەکو زیاد کردنى موچە و زیادبونى موچەى تۆڕى کۆمەڵایەتى و زیاد کردنى دەرماڵەکان یاخود خانەنشینى.

 

بەپێویستیشى دەزانێت پشتنەبەسترێتە سەر چاوەڕوانى بەرزبونەوەى نرخى نەوت بەڵکو دەبێت پشتببەسترێتە سەر سەرچاوەکانى ترى داهات و حکومەت ئێستا لەسەر بنەماى بودجەى ساڵى 2019 دەڕوات و کارەکانى دابەشى 12 مانگ کردووە، بەپێى ئەو داتایانەش دەلاقەیەکى گەورە ڕوودەدات بەهۆى دابەزینى نرخى نەوتەوە.

 

عەلاوى دەشڵێت، عێراق هیچ گەرەنتیەکى ترى ئابورى نیە وەکو وڵاتانى ترى کەنداو کە ئەوەش پاڵ بەحکومەتەوە دەنێت مامەڵە لەگەڵ دامەزراوە نێو دەوڵەتیەکاندا بکات لەنمونەى سندوقى دراوى نێو دەوڵەتى و بانکى نێو دەوڵەتى، بەڵام سندوقى دراو جۆرێک لەپاڵپشتى خێراى هەیە ئەوەش لەسەر بنەماى کۆمەڵێک ڕێ شوێنى بەپەلەى تەکنیکى وەستاوە ڕەنگە چەند مانگێکى پێبچێت، عێراقیش پێویستى بەچارەسەرى خێرا هەیە.

 

ئەوەشى خستووەتە ڕوو، چارەسەرەکان هەن گەرچى هەڵەیەکى بنەڕەتى لە هەیکەلى ئابورى عێراقدا هەیە و لەبودجەکەشدا ڕەنگى داوەتەوە، بەڵام چەند دەزگایەک هەن هێشتا جێگیرن وەکو بانکى ناوەندى کە نزیکەى 65 ملیار دۆلارى تێدایە ئەوەش باشە.

 

وەزیرى دارایى عێراق جەختیکردەوە، حکومەت نایەوێت تەنها موچە بدات، بەڵکو خەرجیەکانى دەوڵەتیش دەبێت دابنرێت کە بەشێکیان دانەوەى قەرزى دەرەکییە هەروەها دابینکردنى پارەیە بۆ چەند کەرتێکى تر.

 

لەکۆتایى وتەکانیدا  عەلاوى ئەوەشى ڕوونکردووەتەوە،  قەیرانەکە لەمانگى ئادار و نیسانەوە دەستى پێکردووە، ئەوەى دەوڵەت بەدەستى هێناوە بۆ پڕکردنەوەى پێداویستیەکانى موچە دابینى کردووە لەناویاندا موچەى خانەنشیان بۆ مانگەکانى چوار و پێنج و شەش.