گه‌ڕان

Shadow Shadow
سیاسه‌تی

دزەكانی گەنمەكەى نەجەف دەستگیردەکرێن

لەتۆڕە کۆمەڵایەتییەکان هەڵمەتێکى گاڵتەکردن بە خواردنى گەنمەکەى نەجەف دەستیپێکرد 

2020.05.22 - 21:04
لەتۆڕە کۆمەڵایەتییەکان هەڵمەتێکى گاڵتەکردن بە خواردنى گەنمەکەى نەجەف دەستیپێکرد 

ناس کورد- 

پرسی دیارنەمانی گەنمی سایلۆكەی نەجەف و باسوخواسى خواردنی لەلایەن كۆترەوە، دەستەی نەزاهەی عێراقی هێناوەتە سەر خەت و دۆسیەی لێكۆڵینەوەی لەو بارەیەوە لەگەڵ چەند بەرپرسێكی شارەكەدا كردووەتەوە.

 

لەڕاگەیەنراوێكدا دەستەی نەزاهەی عێراق ڕایگەیاند، لێكۆڵینەوەكە چوار بەرپرس دەگرێتەوە كە لەسایلۆكەی نەجەف بۆ هەڵگرتنی دانەوێڵە كاریان كردووە.

 

ئاماژەی بۆ ئەوەش كردووە، بڕی گەنمی دیارنەماو گەیشتووەتە 750 تەن كە بڕەكەی بەپارە دەكاتە 400 ملیۆن دیناری عێراقی.

 

میدیا ناوخۆییەكانی شارەكەش ئەوەیان بڵاوكردووەتەوە، بەهۆی دیارنەمانی گەنمەكەوە ژمارەیەك بەرپرس لەكارەكانیان دوورخراونەتەوە لەوانە بەڕێوەبەری سایلۆكە و هەندێ بەرپرسی تری شارەكە.

 

لەگەڵ بڵابونەوەی دەنگۆی دیارنەمانی گەنمەكە و وەڵامی بەرپرسان بەوەی گەنمەكە كۆتر و باڵندە خواردویەتی، لەتۆڕە كۆمەڵایەتیەكانەوە، هەڵمەتێكی گاڵتەكردنی بەرفراوانیان لەسەر ڕوداوەكە لەدوو ڕۆژی ڕابردودا دەستپێكرد، وێنەی كۆتر و باڵندەیان بڵاوكردۆتەوە و كۆمێنتی تەنز ئامێزیان لەسەر نووسى.

ژمارەیەك لەچالاكانیش لەتویتەر وێنەی كۆتریان بەسەری فیل و مەڕ و بزنەوە بڵاوكردووەتەوە بۆ گوزارشتكردن لەبڕوانەبوون بە پاساوی بەرپرسانی سایلۆكە لەسەر دیارنەمانی گەنمەكە گوایە كۆتر خواردویەتی.

 

ژمارەیەكی تریش لەچالاكان، وێنەی گروپێك كۆتریان بڵاوكردووەتەوە كە قسە دەكەن و دڵنیایی ئەوە دەدەن ئەوان گەنمەكەیان نەخواردووە.


ژمارەیەكی تریش لەچالاكان، هەقو حسابی كارەكەیان كردووە و ئەوەیان نوسیووە گەر ئەو قسەیە ڕاستبێت كە گوایە كۆتر گەنمەكەی خواردبێت ئەوا دەبێت نزیكەی ملیۆنێك و 500 هەزار كۆتر بەشداریان لەخواردنی گەنمەكەدا كردبێت.

وێنەی ژمارەیەك لەكۆتری دیكەش بڵاو كراوەتەوە لەژوورێكدا و لەسەری نوسراوە دزی گەنمەكان دەستگیر كراون.

باسى دیارنەمانى گەنمەکەى سایلۆى نەجەف لەنێو تۆڕە کۆمەڵایەتییەکان لەهەرێمى کوردستانیش دەنگدانەوەى زۆرى بەدوادا هات و چەندین تەنزى لەسەر نووسرا.