گه‌ڕان

Shadow Shadow
سیاسه‌تی

زیاتر لە 300 هەزار کرێکاری بەنگلادیشی بەنایاسایی هاتوونەتە عێراق و کاردەکەن

2020.05.22 - 14:09
زیاتر لە 300 هەزار کرێکاری بەنگلادیشی بەنایاسایی هاتوونەتە عێراق و کاردەکەن

ناس کورد-

 

وەزارەتی کار و کاروباری کۆمەڵایەتی عێراق ئاشكرایکرد، زیاتر لە 300 هەزار کرێکاری بەنگلادیشی کە بەنایاسایی هاتوون لە عێراقدا هەن، ئەوەش بەهۆکارێکی دروستبوونی بێکاری بۆ هاووڵاتیانی ناوخۆ دادەنرێت.

 

جەبار باهض، بەڕێوەبەری گشتیی بەڕێوەبەرایەتی کار و ڕاهێنانی پیشەیی لە وەزارەتی کار و کاروباری کۆمەڵایەتی بە میدیا عێراقییەکانی ڕاگەیاند: "بەگوێرەی ئەو ئامارانەی دەستمانکەوتووە دەربارەی کرێکارانی بیانی لە وڵاتەکەمان، زیاتر لە 300 هەزار کرێکاری بەنگلادیشی بە نایاسایی و بەبێ مۆڵەت هاتوونەتە عێراق و کاردەکەن".

 

ئاماژەی بەوەشکردووە: "وەزارەتەکەمان داوای لە لایەنە پەیوەندیدارەکان کردووە، ڕێگەبگرن لە هاتنەناوەوەی کرێکارانی بەنگلادیشی، ئەوەش بەهۆی ژمارە زۆریان و هەروەها لەپێناو کرێکارانی ناوخۆدا".

 

ئەو بەرپرسەی وەزارەتی کار و کاروباری کۆمەڵایەتی عێراق ئەوەشی خستووەتەڕوو، لەئێستادا کە وڵاتەکە بە قەیرانێکی سەختدا تێپەڕدەبێت و ڕێژەی بێکاری بەشێوەیەکی بەرچاو بەرزبووەتەوە، بوونی ئەو ژمارە لە کرێکاری بیانی هێندەیتر بێکاری ناوخۆیی زیاد دەکات.

 

بەشێک لە سەرچاوە سیاسییەکانی عێراق باس لەوەدەکەن، بوونی کرێکارانی بیانی و کارکردن پێیان یەکێکە لە گەندەڵییە داراییەکان، بەوپێیەی کرێکارانی بیانی بە هەرزانتر لە کرێکارانی ناوخۆ کاردەکەن و ئەوەش وا لە خاوەن کارەکان دەکات، کرێکارە ناوخۆییەکان دەربکەن و کرێکاری بیانی لە جێگەیان دابنێن.