گه‌ڕان

Shadow Shadow
سیاسه‌تی

لەبارەی جێبەجێکردنی بڕیاری قەدەغەی هاتوچۆ لە جەژندا پارێزگاری سلێمانی ڕونکردنەوە دەدات

2020.05.22 - 10:16
لەبارەی جێبەجێکردنی بڕیاری قەدەغەی هاتوچۆ لە جەژندا پارێزگاری سلێمانی ڕونکردنەوە دەدات

ناس کورد-

پارێزگاری سلێمانی جێبەجێکردنی بڕیاری وەزارەتی ناوخۆی بۆ قەدەغەی هاتوچۆ لە سنوری پارێزگاکە ڕاگەیاند و ئاماژەی بەوەکرد، سێ ڕۆژی جەژن قەدەغەی هاتوچۆی تەواو دەبێت و لەدوای ئەوە ڕاستەوخۆ کۆتایی دێت.

 

لە میانەی کۆنگرەیەکی ڕۆژنامەنوسیدا تایبەت بە دابینکردنی هەندێک هاوکاری بۆ کۆمەڵێک خێزانی کەمدەرامەت، دەربارەی پرسی قەدەغەی هاتوچۆ لە سنوری پارێزگای سلێمانی، هەڤاڵ ئەبوبەکر، پارێزگاری سلێمانی ڕایگەیاند: "سێ ڕۆژی جەژن ئەو بەیانەی وەزارەتی ناوخۆ دەریکردووە جێبەجێدەکرێت".

 

هەڤاڵ ئەبوبەکر ئاماژەی بەوەشکرد: "بڕیارەکەی وەزارەتی ناوخۆ لە سنوری پارێزگای سلێمانیش جێبەجێدەکرێت و سێ رۆژی جەژن قەدەغەی هاتوچۆی تەواو دەبێت".

 

پارێزگاری سلێمانی ڕونیشیکردەوە: "قەدەغەکردنەکە تەنها سێ ڕۆژی جەژن دەگرێتەوە و لەدوای ئەو کۆتایی دێت، هۆکاری ڕێکارەکانیش تەنها ئەوەیە کە لە جەژندا خەڵک زۆر دەگەڕێن و سەردانی یەکتر دەکەن، بۆیە ناچارین لەم دۆخەدا واز لەو نەریتە جوانە بهێنین".

 

ئەوەشی خستەڕوو، ئەگەر قەدەغەی هاتوچۆ نەبێت، لە رۆژانی جەژندا، گەشتیارێکی زۆر سەردانی پارێزگاکان دەکەن و بەوەش دۆخێکی تەندروستیی نالەبار دروست دەبێت.

 

ئەمە لەکاتێکدایە، رۆژێک پێش دەرکردنی بڕیارەکەی وەزارەتی ناوخۆ، لیژنەی بەرەنگاربوونەوەی کۆرۆنا لە پارێزگای سلێمانی کۆبوونەوە و بەزۆرینەی دەنگ بڕیاردرا لە ڕۆژانی جەژندا لە سنوری پاڕرێزگای سلێمانی قەدەغەی هاتوچۆ نەبێت، بەڵام دواتر وەزارەتی ناوخۆ قەدەغەی هاتوچۆی ڕاگەیاند.