گه‌ڕان

Shadow Shadow
سیاسه‌تی

بە فەرمی وەزارەتی دارایی: بۆ دابینکردنی موچە حکومەت قەرزی کردووە

2020.05.22 - 08:59
بە فەرمی وەزارەتی دارایی: بۆ دابینکردنی موچە حکومەت قەرزی کردووە

ناس کورد-

دوای ئەوەی وەزارەتی دارایی هەرێم بە فەرمی ڕایگەیاند، بۆ دابینکردنی موچەی ئەم مانگە قەرزیان کردووە، سەرۆکی فراکسیۆنی کۆمەڵ لە پەرلەمانی کوردستان ئەوە بە سیناریۆ دەزانێت و دەڵێت، ئەوە پاساوێکە لە ئێستاوە حازریان کردووە تا ئەگەر پارەکەی بەغدا هات ، دابەشی نەکەن و بڵێن داویانەتەوە بە قەرز.

 

شەوی ڕابردوو لە ڕاگەیەندراوێکدا، وەزارەتی دارایی و ئابوری هەرێم ڕایگەیاند: "تا ئێستا ئەو بڕە پارەیەى سەرۆك وەزيرانى عێراق بڕيارى لەسەر ناردنى داوە كە 400 مليار دينارە وەك موچەى فەرمانبەرانى هەرێم، نەگەیشتووە، بەڵام حکومەتی هەرێمی کوردستان بەو داهاتەی لە بەردەستە لە فرۆشتنی نەوت و داهاتی ناوخۆ و قەرزکردنەوە، مووچەی سەرجەم موچەخۆرانمان بەر لە جەژنی پیرۆزی رەمەزان دابەشکرد".

 

لەبەرامبەردا عەبدولستار مەجید، سەرۆکی فراکسیۆنی کۆمەڵ لە پەرلەمانی کوردستان لە هەژماری خۆی لە تۆڕی کۆمەڵایەتی فەیسبوک بڵاویکردەوە: "ئەمە ئەو مەترسییەیە کە هۆشداریمان دابوو لێی ، دوێنێ وتمان هەندێ بەرپرسی حزبیی ئەو باسە دەوروژێنن کە گوایە حکومەت بۆ موچەی مانگی یەک قەرزی کردووە، بەڵام  بەداخەوە ئەمشەو وەزارەتی داراییش لە ڕوونکردنەوەکەیدا تەرویجی بە هەمان بابەت داوەتەوە".

 

سەرۆکی فراکسیۆنی کۆمەڵ ئاماژەی بەوەشکردووە: " ئەوە مەترسییە لەسەر ئەو پارەیەی کە لە بەغداوە دێت و پاساوێکە لە ئێستاوە حازریان کردووە تا ئەگەر پارەکە هات، دابەشی نەکەن و بڵێن داومەنەتەوە بە قەرز".

 

عەبدولستار مەجید ئەوەشی خستووەتەڕوو، پێویستە پەرلەمانی کوردستان و موچەخۆرانیش ئەوە قبوڵ نەکەن و ڕێگەنەدەن ئەو پارەیەی بەغداش، بە دەردی ئەو دەیان ملیار دۆلارە بەرن کە دیار نەماوە و بەناوی قەرز و قەرزارییەوە دیزەبەدەرخۆنە کراوە