گه‌ڕان

Shadow Shadow
سیاسه‌تی

’شکۆى پەرلەمان شکێنراوە’

سۆران عومەر داوایەک ئاڕاستەى ڕێواز فایەق سەرۆکى پەرلەمان دەکات 

2020.05.21 - 14:38
سۆران عومەر داوایەک ئاڕاستەى ڕێواز فایەق سەرۆکى پەرلەمان دەکات 

ناس کورد-رۆژیار سیروان 

سۆران عومەر، ئەندامى پەرلەمانى کوردستان جەخت لەسەر ئەوە "شکاندنى شکۆى" پەرلەمان دەکاتەوە و داوا لە د.ڕێواز فایەق، سەرۆکى پەرلەمانى کوردستان دەکات دەسەڵاتە یاسایی و پەیڕەوییەکانى خۆى بەکاربهێنێت بۆ گەڕانەوەى شکۆ بۆ پەرلەمان و پەرلەمانتاران. 

لەمیانەى ئەنجامدانى کۆنگرەیەکى ڕۆژنامەوانى کە بۆ کەناڵەکانى راگەیاندن ئەنجامیدا و پەیامنێرى ناس کورد ئامادەى بوو، سۆران عومەر ئەندامى پەرلەمانى کوردستان ئاماژەى بەوە کرد "دوێنی (چوارشەممە) تانەیەکم ئاڕاستەى سەرۆکى پەرلەمان کرد لەسەر بڕیاری ژمارە 4ی ساڵى 2020 تایبەت بە هەڵگرتنى پارێزبەندی لەسەر بەندە کە بە رێگایەکى نایاسایی و نادەستوورى و زۆرینەیەکى نایاسایی دەنگیاندا بە هەڵگرتنى  پارێزبەندیەکە". 

 

ئەو پەرلەمانتارە رونیکردەوە کە تانەکەى لەپێناوى خۆى ئاراستەى سەرۆکى پەرلەمان نەکردووە بەڵکو بەهۆى ئەوە ئاراستەى کردووە کە لەو دانیشتنەدا کە پارێزبەندى لەو وەرگیراوەتەوە پەرلەمانى تووشی بێ شکۆیی و  بێ رێزیەکى گەورەی کردووە. 



جەختیشى لەسەر ئەوە کردەوە کە هەوڵەکەى لەپێناو گەڕانەوەی شکۆیە بۆ سەرۆکى پەرلەمان و ئومێدى ئەوەى خواست سەرۆکى پەرلەمان دەسەڵاتى یاسایی خۆى بەکاربهێنێت بۆ پوچەڵکردنەوەى بریارى ژمارە 4ی ساڵى 2020، هەڵگرتنى پارێزبەندى بە یاسایی بکرێت نەک بەو شێوازەى "کودەتا" بەسەر دەسەڵاتى سەرۆکى پەرلەمان بکرێت. 

   

وتیشى "سەرۆکى پەرلەمان ئەرکی جێبەجێکردنى یاسایە و سەرۆکى یەکەمین دەسەڵاتى یاسادانانى ئەم وڵاتەیە نابێت رێگا بدات شکۆى پەرلەمان و پەرلەمانتاران بشکێنرێت".