گه‌ڕان

Shadow Shadow
سیاسه‌تی

ڕۆژنامەى حزبوڵا: سەردانەکەى کازمى بۆ لاى حەشد ئەگەری ڕێکكەوتنی ئەبو فەدەك و لیواکانى مەرجەعیەتى لێدەکرێت

2020.05.20 - 15:40
ڕۆژنامەى حزبوڵا: سەردانەکەى کازمى بۆ لاى حەشد ئەگەری ڕێکكەوتنی ئەبو فەدەك و لیواکانى مەرجەعیەتى لێدەکرێت

ناس کورد-

بەپێی شرۆڤەیەكی ڕۆژنامەی ئەخباری لوبنانی نزیك لە حزبوڵای ئەو وڵاتە لەبارەى بۆ سەردانەكەی ئەمدواییەی مستەفا كازمی بۆلای دەستەی حەشدی، ئەگەری چارەسەركردنی قەیرانەكان و ڕێکكەوتنی نێوان ئەبو فەدەك و چوار لیوا جیابوەوەكەی سەر بەمەرجەعیەتی نەجەف لەئارادایە.

 

ڕۆژنامەكە نوسیویەتی، ئامادەبوونی گروپە جیابووەوەكان بەتایبەتی مەیسەم زەیدی، ئەمینداری گشتی تیمی عەباس چەند ئاماژەیەكی دەرخست سەرباری بوونی جۆرە نكوڵییەك لە گەڕانەوەی ئەو گروپانە بۆ ناو دەستەی حەشدی شەعبی و بوونی دانوستان بۆ چارەسەركردنی كێشەكان بەڵام زانیارییەكان جەخت لەوە دەكەنەوە، ئاڕاستەی ئێستای نەجەف بەرەو پاراستنی یەكڕیزی حەشدی شەعبیە.



مەرجەعیەتی نەجەف پشتیوانی بژاردەكانی كازمی بۆ پاراستنی حەشدی شەعبی دەكات كە بەمدواییانە وتی، مادەی 40ی یاسای ژمارە ساڵی 2016 دەزگاكە دەپارێزێت و پرەنسیپی ئەو دەزگایەش پەیوەستییە بە نیشتیمان و مەرجەعیەتەوە.



لە ڕاگەیەنراوێكدا عەبدولمەهدی كەربەلای نوێنەری مەرجەعیەت كە ڕۆژی هەینی بڵاوی كردەوە ڕایگەیاند، مەرجەعیەت بە پێویستی دەزانێت یاسای دەستەی حەشدی شەعبی جێبەجێبكرێت و كارابكات بەهەموو لایەنەكانیەوە، لەگەڵ جەختكردنەوە لەسەر ئەو بنەمایانەی كە بۆی دامەزراوە و بەپێی ڕۆشناییەكانی مەرجەعیەت.



لەلایەكی ترەوە ئامادەبوونی ئەبو فەدەك مەحمداوی جێگری سەرۆكی دەستە و شوێنگرەوەی ئەبو مەهدی موهەندیس زۆر بەدیاردەكەوت، ئەوەش دروستە كە بەفەرمی دەستنیشاننەكراوە بەڵام چەند ئەركێكی گرنگی پێسپێردراوە.

 

هەر بەپێی ڕۆژنامەكە و لەچوارچێوەی هەوڵەكان بۆ چارەسەركردنی قەیرانی جیابونەوەكان لەڕیزی ئەو میلیشیا چەكدارانەدا پێدەچێت دەسەڵاتی زیاتر بدرێتە زەیدی.




بەپێی شرۆڤەکە سەردانەکە جەختكردنەوە بووە لە ڕۆڵی حەشدی شەعبی و عێراق لە بەرەنگاربونەوەی تیرۆر و وەرچەرخانە ناوچەیەكاندا كە لەسەر زاری كازمیەوە ڕاگەیەنرا، شەڕی ئەوان لەگەڵ تیرۆردا درێژخایەن نییە بەڵكو شەڕكردنیان بۆ چاكسازی درێژخایەنە.



هەر بەپێی لێكدانەوەی ڕۆژنامەكە ئەو وتانەی كە کازمى بەبەرگی حەشدی شەعبیەوە پێشكەشی كرد، پەیامێكە بۆ ئەوەی حەشدی شەعبی پەیوەستە بەدەوڵەتەوە و سوورە لەسەر مانەوەی ئەو دەزگایە سەر بەحكومەت.



ئاماژە بۆ ئەوەشكراوە، سەردانەكەی كازمی پڕۆتۆكۆڵی نەبوو بەتایبەت دوای سەردانەكەی بۆ وەزارەتی بەرگری و دەزگای بەرەنگاربوونەوەی تیرۆر و پێشتریش بۆ وەزارەتی ناوخۆ، بەڵام جەختكردنەوە بوو لەئامادەسازی بۆ گەڕانەوەی شكۆی دەزگاكانی دەوڵەت كە چەند مانگێكە گیروگرفتی گەورە ڕوویتێكردوون، لەلایەكی تریشەوە بەو سەردانە كازمی ویستی وەڵامی هەندێ پەلاماری داعش بداتەوە كە بەمدواییە چەند گرفتێكی ئەمنیان لەهەندێ شاری عێراق دروستكرد.