گه‌ڕان

Shadow Shadow
سیاسه‌تی

لەبارەى کاندیدکردنەوەى فوئاد حسێن

پەیامێکی ڕوون لە حیکمەوە بۆ پارتی: ڕێز لە کۆدەنگی سیاسی بگرن

2020.05.20 - 10:58
پەیامێکی ڕوون لە حیکمەوە بۆ پارتی: ڕێز لە کۆدەنگی سیاسی بگرن

ناس کورد-

فراکسیۆنى حیکمەى پەرلەمانی ڕایگەیاند، پێویستە پارتی و لایەنە کوردییەکان "ڕێز لە کۆدەنگی سیاسی" بگرن کە نابێت کابینەکەى کازمی هیچ وەزیرێکی کابینەى پێشووی تێدا بێت.

 

حەسەن فەدعم، پەرلەمانتار لە فراکسیۆنى ڕەوتی حیکمەى سەر بە عەمار حەکیم بە ماڵپەری فەرمی حکومەتى عێراقی وتووە، کۆدەنگییەک هەیە لەناو لایەنە سیاسییەکان کە دەبێت کابینەکەى کازمی خاڵی بێت لەو وەزیرانەى لە کابینەکەى عەبدولمەهدیدا بەشدار بوون و جەخت دەکاتەوە کە نابێت "کورد هیچ وەزیرێکی پێشوو بۆ وەزارەتەکانی دەرەوە و داد پێشکەش بکەن."

 

ئەوە لەکاتێکدا پارتی لەڕێگەى بەرپرسان و فراکسیۆنەکەیەوە لە بەغدا چەندینجار جەختیان کردووەتەوە کە فوئاد حسێن تاکە کاندیدی حزبەکەیانە بۆ وەرگرتنی پۆستی وەزیری دەرەوەی عێراق کە لە کابینەکەى عەبدولمەهدیدا وەزیری دارایی بووە، یەکێتیش تائێستا خالید شوانی کاندیدی سەرەکییەتی بۆ پۆستی وەزارەتی داد.

 

حەسەن فەدعم باسی لەوەشکرد کە "لەکاتی دانوستانەکانی پێکهێنانی حکومەتەکەیدا، 150 پەرلەمانتار و 15 پارێزگار داوایەکیان ئاڕاستەى کازمی کرد بۆ مانەوەى نوری دلێمی، وەزیری پلاندانانی پێشوو بەهۆی ئەوەى وەزیرێکی سەرکەوتوو بووە، بەڵام ئەوەش نەکرا."

 

دەشڵێت، "هەروەها خواستێک هەبوو بۆ مانەوەى کەعفەر عەلاوی، وەزیری تەندروستی بەهۆی سەرکەوتنی لە ڕوبەڕوبوونەوەى کۆرۆنا، بەڵام سوربوونی لایەنە سیاسییەکان لەسەر نەبوونی هیچ وەزیرێکی پێشوو لە کابینەکەى کازمی، ڕێگەى نەدا هیچ کامیان دابنرێنەوە."

 

هاوکات پەرلەمانتارێكی سەر بە ڕەوتەكەی موقتەدا سەدر ئاشكرای كرد، سەرۆكوەزیرانی عێراق بە ناڕاستەوخۆ لایەنە سیاسیەكانی بۆ تەواوكردنی دۆسییەی وەزارەتە بەتاڵەكانی ئاگادار كردووەتەوە و پێشبینیش دەكرێت بەمنزیكانە تەواو بكرێت.

 

مزر سەلمان، پەرلەمانتاری هاوپەیمانی سائیرون لە پەرلەمانی عێراق بە میدیا عێراقیەكانی ڕاگەیاندووە، ئەگەری هەیە 20 و 21ی ئەم مانگە كاندیدەكان بۆ پڕكردنەوەی وەزارەتە بەتاڵەكانی پێشكەشی پەرلەمان بكرێت.

 

ئاماژەی بۆ ئەوەش كردووە، لەم هەفتەیەدا پەرلەمان دەنگ بۆ پڕكردنەوەی كابینە بەتاڵەكان دەدات بەڵام تا ئیستا دەستەی سەرۆكایەتی هیچ كاتێكیان بۆ دەنگدان دیاری نەكردووە.

 

سەلمان وتوشیەتی، سەرۆكوەزیران لە نامەیەكدا داوا لە سەرۆكایەتی پەرلەمان دەكات كاتێك بۆ دانیشتنی متمانەدان بەو وەزارەتە بەتاڵانە دیاری بکرێت.

 

جەختی لەوەش كردووەتەوە، ئەو حەوت وەزارەتە بەتاڵە پڕدەكرێنەوە و یەكلادەبنەوە.

 

لای خۆشیەوە، عەلی تەمیمی، یاساناسی دیاری عێراقی ڕاگەیاندووە، دەستوری عێراق  بەپێی مادەی 76 كاتی بۆ پڕكردنەوەی كابینە وەزارییە بەتاڵەكان دیاری نەكردووە دوای متمانە وەرگرتنی حکومەت و ڕوون نەكراوەتەوە.

 

تەمیمی ئەوەشی خستووەتەڕوو، دوای متمانەوەرگرتنی كابینەكە بە پەنجا كۆ یەكی دەنگدەران، ئاماژە بۆ كاتی پڕكردنەوەی وەزارەتە بەتاڵەكان نەكراوە.