گه‌ڕان

Shadow Shadow
سیاسه‌تی

ئیتاڵیا کەمترین ژمارەى مردنی ڕۆژانەى بە کۆرۆنا ڕاگەیاند کە 99 کەسە

2020.05.18 - 20:09
ئیتاڵیا کەمترین ژمارەى مردنی ڕۆژانەى بە کۆرۆنا ڕاگەیاند کە 99 کەسە

ناس کورد-

ژمارەى مردنی ڕۆژانەى هاوڵاتیانی ئیتاڵیا بە کۆرۆنا بەرەو دابەزین دەڕوات، ئەمڕۆ تەنها 99 حاڵەتی مردن تۆمارکراوە کە ئەوەش کەمترینە لە 9ی ئازارەوە.

 

ئەمڕۆ دووشەممە، 18ی ئایاری 2020، دەستەى بەرگریی شارستانی ئیتاڵی ئاماری نوێی ڤایرۆسەکەى ڕاگەیاند و لە 24 کاتژمێری ڕابردوودا 99 کەس مردوون ئەوەش لە 9ی ئازارەوە نمونەى نەبووە، ژمارەى گشتیی مردووانیش گەیشتووەتە 32 هەزار کەس.

 

ژمارەى مردن بە کۆرۆنا لە ئیتاڵیا بەردەوام لە دابەزیندایە، ڕۆژی 14ی ئایار 262 حاڵەت بوو، 15ی ئایار بوو بە 242، 16ی مانگ 153 تۆمار کراوە و 17ی مانگیش بوو بە 145.

 

نەک هەر مردن، بۆ حاڵەتە نوێیەکانی توشبوونیش هەمان شت ڕاستە، لە 24 کاتژمێری ڕابردوودا 451 حاڵەتی نوێی کۆرۆنا تۆمارکراوە و ژمارەى گشتیی توشبووانیشی گەیاندە 225 هەزار و 886 حاڵەت.

 

دابەزینی بەردەوامی تۆمارکردنی حاڵەتە نوێیەکان هەواڵێکی دڵخۆشکەرە بۆ ئیتاڵییەکان کە لە 2ی ئازارەوە نمونەى نەبووە، ڕۆژی 14ی ئایار 992 حاڵەتی نوێ تۆمارکرا، 15ی ئایار بوو بە 789 و 16ی ئایاریش بوو بە 875، ڕۆژی 17ی ئایاریش بوو بە 675 حاڵەت.

 

دەستەکە ئاماژەى بەوەشکردووە تائێستا یەک ملیۆن و 959 هەزار پشکنین کراوە بۆ هاوڵاتیان، ژمارەى چاکبووەکانیش گەیشتووەتە 127 هەزار و 326 کەس.