گه‌ڕان

Shadow Shadow
سیاسه‌تی

دواى دەرکردنى بڕیارى ئازادکردنى

بەدەل بەروارى لەسەر تۆمەتێکى دیکە دەستبەسەرکرا

2020.05.18 - 16:42
بەدەل بەروارى لەسەر تۆمەتێکى دیکە دەستبەسەرکرا

ناس کورد-مەتین ساڵح

 

بەدەل بەرواری مامۆستا و چالاکوانی مەدەنی لە دهۆک لەسەر تۆمەتێکى دیکە دەستبەسەرکرا، دواى ئەوەى لەسەر تۆمەتەکەى پێشوو دادگا بڕیارى ئازادکردنى بۆ دەرکرد.

 

بەدەل بەروارى نیوەشەوى شەممە لەماڵەکەى خۆى لەلایەن هێزە ئەمنییەکانى دهۆکەوە دەستگیرکرا، بەتۆمەتى ئەنجامدانی خوپیشاندانی بێ مۆڵەت، بەڵام ئەمڕۆ دادگا بڕیارى ئازادکردنى بۆ دەرکرد.

 

ئەیاد سەعدى  پارێزەر و ئاندام لە گروپی پارێزەرانی خوبەخش بە ناس کوردى ڕاگەیاند "پاش ئەوەی دادگا بڕیارى ئازادکردنى بەدەل بەروارى دەکرد، کەیسێكی ترى لەسەر کراوەتەوە، بە تۆمەتى هاندانی خوپیشاندانەکەى دهۆک و جارێکى تر دەستبەسەكراوە".

 

وتیشى "ئەو کەیسەى پێشتر لەسەر بەدەل بەروارى کرابووەوە پەیوەندى بە تۆمەتى ئەنجامدانی خوپیشاندانی بێ مۆڵەت بووە".

 

بەدەل بەرواری مامۆستای بنەڕەتیە و لە پەنجاكانی تەمەنیەتی، رۆژى هەینى لە گرتەیەكی ڤیدیۆیدا داوای لە مامۆستایان و فەرمانبەران و موچەخۆرانی شاری دهۆك كرد بەشداری لە ئەنجامدانی خۆپیشاندانێكی ناڕەزایەتی بۆ داواکردنى موچەكانیان بكەن.  

 

بەدەل بەروارى شەوى پێش بەڕێوەچوونى خۆپیشاندانەکە دەستگیرکرا و ماوەى سێ رۆژە لە زینداندایە.

 

جگە لە بەدەل بەروارى ژمارەکى زۆر لە خۆپیشاندەرانى دهۆک رۆژى شەممە دەستگیرکران و دوێنێ و ئەمڕۆ زۆربەیان بە کەفالەت ئازادکران.

 

پێشتر ئەیاد سەعدى بە ناس کوردى ڕاگەیاندبوو، 14 زیندانى خۆپیشاندانەکەى دهۆک لە زینداندا مابوون و ئەمڕۆ (دووشەممە) 12 زیندانییان ئازادکران، بەڵام دوو خۆپیشاندەر هێشتا ئازادنەکراون و تائێستا ناسنامەیان دیار نییە.